Kurt Oddekalv fekk ei bot på 120 000 kroner for stuntet, men den har han nekta å betale.
Dermed var det duka for rettssak i Nordhordland tingrett i dag.
– Vi har ein demokratisk rett til å demonstrere mot oppdrettnæringens herjingar. Eg har ikkje brukt vald eller noko. At dei er blitt litt skremt, det får dei tole, seier Kurt Oddekalv.
Helte H-mjølk i merdane
Det var på seinsommaren i 2011 at miljøforkjemparen gjekk høgt ut og sa han hadde tømt rotenon i eit oppdrettsanlegg i Sørfjorden. I realiteten var det fleire liter med H-mjølk han hadde helt ut.
- BAKGRUNN: | «Rotenon» var 20 liter h-mjølk
Andre miljøorganisasjonar tok kraftig avstand frå oppførselen til Oddekalv, og skreiv i ei pressemelding at "ein aksjon basert på løgn må karakteriseres som elendig".
- Aksjonen framkalla frykt
Lerøy Vest, som eig anlegget som fekk mjølken i merdane, opplyste til politiet etter aksjonen at ingen fisk hadde døydd.
– Dette er innafor det demokratiet bør tole. Ein bør tole denne forma for gateteater, held Oddekalv fram.
Politiet meiner at aksjonen til Oddekalv var egna til å framkalle frykt hjå dei tilsette i oppdrettsanlegget for at fisk ville døy og at ein skulle miste store økonomiske verdiar.
– Det var oppfatta frå dei at dette var ein reell skadehandling. Det ligg i handlinga at han trugar med å sprøyte gift i anlegget. Ein konsekvens at det ville bety at mesteparten av fisken ville døy, seier aktor Ole Bjørn Mevatne.
– Eg er skremt over måtar dei har øydelagt kysten vår på, svarar Oddekalv.
Det er sett av to dagar til saka.
