Ny stor Havyard-kontrakt

Verftet i Leirvik skal byggje eit avansert subsea-fartøy for Forland Shipping i Bergen, som er ein ny kunde for Havyard. Selskapet har i dag tre skip innan olje- og seismikkverksemd.

Administrerande direktør Geir Johan Bakke i Havyard Group er naturleg nok godt nøgd med kontrakten.

– Vi håpar dette er starten på eit langt og godt forhold. Vi har alt etablert eit godt samarbeid gjennom utviklinga av dette skipet, og det viser at det er god kompetanse på begge sider av forhandlingsbordet.

LES OGSÅ: Havyard-skip sette verdsrekord

LES OGSÅ: Sikra andre storkontrakt på ei veke

LES OGSÅ: Sikra kontrakt til 500 millionar

Verd 600 millionar

Kontrakten er verd rundt 600 millionar kroner og gir dei 400 tilsette ved Havyard Leirvik arbeid til august 2013. Verftet skal levere fire skip i 2012 og så langt to i 2013.

Verftsdirektør Trygve Solaas seier at Havyard er skjerma frå krisa ute i Europa fordi dei leverer skip til norske reiarlag som har kontraktar i oljebransjen. Der går aktiviteten meir eller mindre upåverka av det som skjer ute i verda.

– Den krisa vi ser lengre sør har ikkje slege inn over vårt område slik vi kunne ha frykta. Ein høg oljepris som vi framleis har er positiv for oss fordi det gir økonomi i oljeindustrien, og det kjem oss til gode i neste omgang.

– Veldig stolte, og det kjem meir

For Solaas og resten av dei tilsette er kontrakten ei ny fjør i hatten.

– Vi er veldig stolte over at vi greier å henge med og skaffe oss nye kontraktar og nye kundar i ein konkurranseutsett industri.

Og han reknar med fleire kontraktar i tida framover.

– Mange av dei nye oljefunna blir vunne ut ved hjelp av teknologi på havbotnen. Dette er moderne fartøy, og vi ventar meir slikt framover.

Nytt design

Havyard har tidlegare hausta lovord for designet sitt, m.a. vart Seven Havila kåra til årets offshorefartøy i 2011. Skipet som Forland Shipping har bestilt skal byggjast på eit nytt design, fortel adm. dir. Geir Johan Bakke.

– Vi har store forventningar til dette designet. Tidlegare har Havyard levert liknande subsea-fartøy som Seven Havila, Havila Phoenix og Havila Subsea, som alle fungerer godt for eigarane og oppdragsgjevarane. Vi meiner difor at vi er godt rusta til utfordringa det er med å levere denne typen fartøy.

Skipet som skal leverast til Forland Shipping blir 110 meter langt og 22 meter breitt, det blir på 4750 dødvekttonn, og dekket blir på 1000 kvadratmeter.