Fram til no har ein trudd at bildekk, tekstilar og pellet var den største årsaka til mikroplast i havet.
No viser ein ny rapport kva som bidreg med 1,9 millionar tonn, eller 58 % av mikroplast i havet kvart år.
Det er nemleg måling.
Forskarane Julien Boucher og Paola Paruta jobbar ved Enviromental Action, som er eit forskingsbasert konsulentfirma. Dei er forfattarane bak rapporten, som er den første globale studien som er gjort av målingsrelatert mikroplast i verdshavet.
Studien har spora måling gjennom heile levetida.
Målinga kan gå tapt før den når materialet (påføring, måling), det kan losna frå det (slitasje, fjerning), eller det kan kastast (ubrukt).
Studien har ikkje tatt høgde for lekkasje frå måling innebygd i nye produkt.
100.000 tomflasker frå kvar oljeplattform
Båtar, riggar og plattformer må malast ofte for å unngå rust og korrosjon. Før ny måling blir påført, må den gamle blåsast av. Det er her mykje av utsleppa oppstår.
Selskapet Pinovo har støtta forskinga økonomisk, og har estimert at forureininga av mikroplast per oljerigg er på rundt 1000 kilo.
Det kan samanliknast med at over 100.000 tomflasker blir dumpa på sjøen kvart år, frå kvar einaste oljeplattform.
Styreleiar i Pinovo, Declan McAdams, seier dei kontakta Environmental Action for å få meir faktagrunnlag for kor mykje mikroplast frå måling ender opp til sjøs.
– Det var tidlegare tre former for plast i havet. Dekk, tekstil og pellet. Dei er viktige, men den største kjelda er måling, seier McAdams.
Meiner industrien har vore flinke
Organisasjonen Norsk olje og gass meiner denne rapporten understrekar behov som næringa har vore klar over lenge.
– Me nemnde desse problema gjennom styresmaktene i 2014, og denne rapporten legg vekt på eit problem som industrien tek på alvor, seier Einar Lystad, som er fagsjef for havmiljø i Norsk Olje og Gass.
Lystad nemner ny sandblåsingsteknologi, som samlar opp mellom 70 og 80 prosent av målinga dei skreller av. Alternativet er å la alt hamna på sjøen, som ein gjorde før.
– Bør bli pensum for målingsprodusentar og skipsverft
Nina Jensen er marinbiolog og administrerande direktør i Rev Ocean, eit privat finansiert forskings- og ekspedisjonsskip.
Ho er skuffa, men ikkje overraska over funna i rapporten.
– Me veit jo at måling i stor grad består av plast, men utfordringa er at det ikkje har vore kvantifisert. Dette bør bli pensum for målingsprodusentar, skipsverft og boreriggar, seier Jensen.
- Les også:
Jotun rosar forskingsinitiativet
I ein e-post til NRK skriv kommunikasjonsdirektør i Jotun, Christian Espolin Johnson, at dette føyer seg i rekka av publikasjonar og forsking som set fokus på marin mikroplast og utfordringane rundt det.
– Der er mange ubesvarte spørsmål rundt opphav og nedbrytingsprosessar, og Jotun rosar derfor forskingsinitiativet knytt til mikroplast i havet, seier Espolin Johnson.
Han nemner òg at dei samarbeider mellom anna med NTNU for å kunne forstå og analysera mikroplast ytterlegare.
Meiner tida er inne for handling
Naturvernforbundet er ein organisasjon som lenge har engasjert seg mot plastforureining.
Ingvild Sundal Joys er prosjektleiar i Naturvernforbundet Hordaland, og er utdanna marinbiolog.
Ho seier ho ikkje er overraska over funna, og minner om at årsaka til at det har vore krevjande å finna kjelda til utsleppa, er storleiken på partiklane. No er tida inne for handling, meiner Sundal Joys.
– Me meiner at plastmaterialet må erstattast med andre nedbrytbare stoff, og at ein kan leggja til rette for fleire vedlikehaldsplassar med reinsing av kjemikaliar. Då kan ein hindra utslepp, seier Sundal Joys.