Fleire eldre bør gjere som Ingrid og Torleif Seljestokken, meiner staten.
Medan dei enno er friske og raske har dei har bygd om huset sitt frå 70-talet for å få alt på eit plan.
Slik kan dei framleis bu heime på Seljestokken, nord for Florø. Sjølv om helsa skulle skrante.
– Vi håpar å få bu her lenge, seier Ingrid Seljestokken.
Paret er langt frå pleietrengande men om behovet ein gong skulle kome kan samfunnet spare millionar på at eldre kan utsetje å flytte på sjukeheim.
9 av 10 eldre ønsker å bu heime. Ingrid og Torleif er blant dei.
Foto: Arne Stubhaug / NRK– Fleire må bu heime
Ein sjukeheimsplass kostar rundt éin million kroner i året.
Talet på sjukeheimsplassar i Noreg går ned, samtidig som talet på eldre går opp.
– Det er lønsamt for samfunnet at vi bur heime så lenge som mogeleg. Men då må vi vere friske nok til det, seier Bettina Husebø.
Ho er professor ved Universitetet i Bergen og leiar for senter for alders- og sjukeheimsmedisin.
Presset på sjukeheimsplassar vil auke særleg frå 2025, for då vil den store etterkrigsgenerasjonen nå 80-årsalderen.
I prognosane til Statistisk sentralbyrå vil det vere nesten 485.000 over 80 år i 2040.
I dag er talet 240.000.
På same tid er det 40.000 sjukeheimsplassar i landet.
Ei av løysingane på misforholdet er å legge til rette for at folk kan bu heime lenger.
Har flytta vaskerommet opp
Ingrid og Torleif har i fleire år gått ned den bratte trappa for å komme til vaskerommet og frysaren i kjellaren.
Etter at dei kjende på dårlege kne i slutten av 60-åra valde dei å ta grep.
– Vi har bygd på huset og flytta vaskerommet opp, slik at vi ikkje lenger treng å bruke trappa, seier Ingrid som no har alt ho trenger på eitt plan.
Vaskemaskin og tørketrommel er for første gong på same plan som badet og kjøkkenet.
Foto: Arne Stubhaug / NRK– Fleire er nøydde til å bu heime
– Vi ser at nokre bygger om bustaden, men ikkje så mange som burde gjere det.
Det seier Carsten Henrik Pihl, forbrukar- og kommunikasjonssjef i Huseiernes Landsforbund.
Undersøkingar dei har gjort saman med Pensjonistforbundet viser at 9 av 10 ønsker å bli buande heime.
– Fleire er nøydde til å bu heime, men då må bustaden tilpassast. For eksempel med fysiske tilpassingar eller ulike formar for velferdsteknologi.
