Nordlyset dansa på kveldshimmelen

– Då eg stod heime på verandaen og såg nordlyset på himmelen skunda eg meg til Sørstranda i Florø. Der visste eg at eg ville få fine bilete, fortel Dan Børge Vallestad Nygård.

Dei siste dagane har vore spektakulære for dei som er interesserte i astronomi med solformørkinga fredag som eit definitivt høgdepunkt.

• Les også: Har venta på solformørkinga i 25 år
• Les også: Sjå video og bilete frå solformørkinga

Han har i fleire år tatt bilete av stjerner på himmelen. Men nordlys er eit uvanleg fenomen for han å få på film.

– Det er første gong eg har tatt slike bilete av nordlyset. Men eg visste at eg måtte komme meg til Sørstranda for å få gode bilete, seier hobbyfotografen.

Sett saman fleire hundre bilete

Han har ved hjelp av eit spegelreflekskamera festa fleire hundre bilete til film, i ein såkalla time-lapse.

– Det tar ganske mykje tid å sette saman.

Han har fotografering av himmellekamar som hobby, og er i grenseland for kunne kategorisere interessa si som astro-fotograf.

– Det blir nok ikkje siste gong eg tar bilete av nordlyset, seier Vallestad Nygård.

Fredag var dei fleste interessert i den historiske solformørkinga som var meir eller mindre synleg i Sogn og Fjordane.