Tre karar kostar kring den nyrenoverte fontena i Kyrkjeparken på Nordfjordeid. Det er siste hand på verket for fontena som har fått ny botn og tette sider.
I Eid får folk utanfor arbeidslivet tilbod om å bli sett i aktivitet av kommunen, snart kjem ordninga over heile landet.
– Det er eit flott alternativ til å sitje heime, seier Per-Åge Wahlberg.
Arbeidskameraten Bjørnar Agledal Rangsæter er samd.
– Du kjem elles lett inn i ein periode der du føler du ikkje kan gjere noko nytte for deg, seier Rangsæter.
No kjem aktivitetsplikta
Politikarane har snakka om målet i årevis. Ap-statsråd Bjarne Håkon Hanssen var kanskje den fyrste som sa at folk skulle "opp om morgonen". Frp-statsråd Robert Eriksson ville innføre kravet frå 2015, det viste seg å ta fleire år.
Men no har regjeringa klart eit lovframlegg der aktivitetsplikt kjem i alle kommunar i Noreg, framlegget kjem etter at Stortinget bad om ordninga.
Statssekretær Christl Kvam seier regelen i fyrste omgang skal gjelde for folk under 30 år. Alle som har helse til det skal vere i aktivitet, og gjennomføre pliktene kommunen krev.
– Det viktige er å kome seg i aktivitet og opp av sofaen, seier Kvam.
- LES OGSÅ: Åtvarar mot aktivitetsplikt
– Folk som ikkje møter mister pengar
Folk som er i form til å gjere noko, men som nektar, vil få mindre pengar.
– Dei som ikkje møter og som nektar å møte i aktiviteten vil få redusert sine ytingar.
Kan dette bli oppfatta som ei straff?
– Kommunen skal ha god dialog med sine sosialhjelpsmottakarar. Dette er meint som ei moglegheit og ikkje ei straff.
– Aukar sjansen for arbeid
Nokre kommunar er alt i sving. I Eid kommune får folk utanfor arbeidslivet oppgåver.
– Ved å gi folk arbeidstrening og ein referanse så aukar sjansen for å kome inn i vanleg arbeid, seier leiar i Nav Eid Bodil Førde.
Christl Kvam seier kommunane har hausta gode erfaringar.
– Eg meiner Eid kommune jobbar frykteleg godt med dette, også fleire andre kommunar er godt nøgde med ordninga, seier Kvam.
Stortinget bad regjeringa i fjor om å innføre aktivitetsplikt. Men fyrst måtte KS og staten bli samde om kva kommunane skal få i kompensasjon for større utgifter. Partane er no samde, men regjeringa kan ikkje seie noko no om kva ordninga vil koste.
– Har lært mykje
Tilbake i Kyrkjeparken på Nordfjordeid er oppdraget snart utført, og vatnet fossar i fontena.
– Vi lærer veldig mykje nytt. Dette kunne eg aldri ha tenkt på å gjere før, seier Rangsæter.