No merkar Hydro-verka koronakrisa

Norsk Hydro hadde eit samla driftsresultat i tredje kvartal på 1,4 milliardar kroner. Sjølv om dette samla sett er ein auke mot fjoråret sine tal frå same kvartal, er det varierande grad av økonomiske gladmeldingar rundt omkring dei ulike verka i Vestland.

Særleg metallverket på Husnes i Sunnhordland har hatt eit krevjande år, og presenterte eit underskot i tredje kvartal på 98 millionar kroner.

– Tredje kvartal var ein krevjande periode for Hydro Husnes. Det er framleis ein utrygg marknad som følgje av covid-19, samstundes har vi lidd eit økonomisk tap på grunn av tilbakekjøp av overskotskraft, seier fabrikksjef Johan Berg på Husnes til NRK.

Metallverket skulle etter planen starta opp ein ny produksjonshall i 2020. Dette har blitt utsett grunna koronakrisa, og Hydro har dermed selt straum dei ikkje trengde med tap til rekordlåge marknadsprisar.

Låge metallprisar

Koronapandemien har ført til låg etterspurnad på metall. Når etterspurnaden går ned, går òg prisen ned. Dette vert peika på som ein av årsakene til det svake driftsresultatet frå metallverka.

Trass i låge metallprisar, er produksjonskapasiteten på veg opp, og prisen på aluminium vert styrka.

–Eit lite, men fleksibelt verk

Det minste verket ligg i Høyanger, og er eit av to som gjekk med overskot. Fabrikksjef Arne Martin Kjærland meiner storleiken på metallverket har vore ein fordel med tanke på evna til å omstilla seg.

– Når volumet går ned, justerer me oss etter marknaden ganske raskt, seier Kjærland til NRK.

Han ser positivt på framtida, men minner om at valutakursen gjer at resultatet vert unaturleg bra.