No kjenner han alvoret tynge

Høgrepolitikaren er 2. vara til kommunestyret og er blant dei i partiet sitt som ynskjer å utsetje avgjerda om å slå Vågsøy og Flora kommunar saman til Kinn kommune.

Kjell Gunnar Tennebø meiner kommunereforma kan ha skapt unødig splid og vondt blod blant gode naboar.

• Les også: Kommuneekspert: – Kinn kommune er ein dårleg idé utan Bremanger

– Det er veldig trasig. Vi har mykje til felles i Nordfjord-regionen. Dersom det blir ei utsetting så kan ein finne endå betre løysingar enn berre Vågsøy og Flora, seier Tennebø.

– Alvoret kjem sigande

Den tvilande høgrepolitikaren kan bli tunga på vektskåla når framtida til Kinn kommune blir avgjort. Anten blir den ein realitet, eller så havarerer draumen.

• Les også: Vågsøy har fått nytt friarbrev

Ei oppteljing NRK har gjort syner at Høgre truleg blir avgjerande. Her er meiningane delte. Vararepresentantane har fått beskjed om å vere klare, og Tennebø kjenner på ansvaret.

– Det er klart at det er ei veldig, veldig viktig sak. Alvoret kjem sigande etter kvart, seier han.

Vil ha Bremanger med

Dei fleste i partiet meiner det trengst endra kommunegrenser, men representantane er usamde om det er smartast å slå seg saman med Flora to timar unna. Og med ein fjord og Bremanger kommune i mellom.

Delte er også meiningane på gata i Måløy. Harald Ellingsen meiner det er synd om Bremanger ikkje vil vere med.

• Les også: Kommunalministeren til Vågsøy: – No går toget

– Då er spørsmålet om Sanner kjem og brukar pisken. Eg er i mot tvang, så eigentleg håpar eg ikkje det, men eg tykkjer ein skulle gått hardare på og prøve å få dei med, seier han.

– Lytt til folket

– Eg meiner vi bør seie nei. Det er litt langt vekke, meiner Kari Haug utanfor butikken på Raudeberg.

Over halvparten av innbyggjarane i kommunen deler synspunktet til Haug. Ifølgje ei brukarundersøking ynskjer derimot 34 prosent å seie ja til Kinn, slik som politikarane i Flora allereie har gjort. Det har også formannskapet i Vågsøy gjort. Slikt irriterer.

• Les også: Sprikande svar på innbyggjarundersøkinga

– Dei bør høyre på folket. Det er vi som skal bu og vere her, seier Haug.

800 underskrifter

Atle Bortne meiner lokalpolitikarane i Nordfjord har gjort ein for dårleg jobb med å snakke saman. Han fryktar at innbyggjarane blir taparane.

– Dei har brukt for mykje tid på krangling og dårlege uttalar som fornærmar. Det er ikkje noko god måte å byrje forhandlingane på, seier han.

Gruppeleiar i partiet Raudt, Geir Oldeide, har sanka inn over 800 underskrifter i krav om ei folkerøysting. Også dette er eit krav som kan bli avgjort seinare i dag.

– Veldig mange er engasjerte. Det er på ein heilt annan måte no, enn ved førre korsveg då vi diskuterte samanslåing med Selje/Vanylven, seier Oldeide.