No har Inger Anne tre gull på rad

– Eg er alltid nøgd med NM-gull, smiler Inger Anne Frøysedal etter at ho har teke sitt tredje strake NM-gull i suveren stil.

Ho har hatt ein trøblete sesong, med mykje skader - og der ho som storfavoritt heller ikkje fekk klaff under junior-NM førre helg.

• LES OGSÅ: Frøysedal håpar å snu nedturen

Tilbake etter mykje trøbel

Difor smakte gullet på «heimebane» ekstra godt for tresteghopparen frå Oppstryn.

Lengstehoppet på 13,30 meter var nesten éin meter lenger enn nærmaste konkurrent på sølvplass, og også årsbeste for Frøysedal.

– I førre veke var det mykje som skjedde. Eg var sliten etter at eg deltok i lengde dagen før, og eg kjende ein strekk i låret. Men i dag stemte alt, og med litt meir trening i beina kunne dette ha blitt langt, seier ho.

• LES OGSÅ: Seks utøvarar kan ta NM-medalje

(Artikkelen held fram under biletet)

Gullvinnaren imponert over bronsen

Ein annan som imponerte minst like mykje var Cecilie Rise Ortner. Den gamle dronninga i tresteg gjorde comeback på heimebane etter seks års fråver.

Det enda med bronse - til stor jubel frå heimepulikum på Byrkjelo.

– Eg er imponert over det ho fekk til. Det er tøft gjort, seier Frøysedal.

• LES OGSÅ: 34-åring gjer comeback i NM

– Godt som gull for meg

Gullvinnaren var for ung til å konkurrere i tresteg då Rise herja i NM-samanheng for snart ti år sidan.

Sjølv er Rise Ortner lykkeleg over bronsen.

– Det var det beste eg kunne håpe på. Det er godt som gull for meg, seier ho.

Ho hadde familien på tribunen, og fekk stor støtte frå publikum på Byrkjelo stadion.