No er sveleautomaten – og el-ferja – endeleg i drift

– For oss og heile organisasjonen er dette ein stor dag. Vi har gleda oss veldig til dette. Dette er det første heilelektriske sambandet i verda, seier Dagfinn Neteland, administrerande direktør i Fjord1.

Dei to ferjene skulle ha vore i drift frå 1. januar, men dårleg vêr gjorde at turen frå Tyrkia tok lengre tid enn planlagt.

– Det var krevjande og utfordrande forhold for ei ferje som er bygd for å gå i ein fjord med eit par meter høge bølger. På turen oppover måtte vi over ope hav og møtte bølger på over sju meter. Det gjorde at turen tok litt lengre tid, seier kaptein Knut Tore Myklebust på MF «Gloppefjord», som var med frå Tyrkia og opp.

Svelene på plass

MF «Gloppefjord» kom først av dei to ferjene, medan MF «Eidsfjord» framleis ikkje har kome lengre enn til kysten nord i Spania.

Og på plass til den første turen var også dei mykje omtala sveleautomatane. For reaksjonane lét ikkje vente på seg då Fjord 1 fortalde at dei ikkje skulle laga ferske sveler om bord på dei nye ferjene.

– Vi har aldri tenkte at vi ikkje skulle selje sveler, men at vi skulle gjera det på ein måte. Vi skal no selje flotte og gode sveler frå automat. Eg har stor tru på det, seier Neteland.

• Høyr intervjuet: Kjell «Kjellen» Bigset er skeptisk til sveler i automat