Ni kommunar med intensjonsavtale om storkommune

Det vart klart då Samarbeidsforum i Sunnfjord (SIS), HAFS-kommunane (minus Solund) og Gloppen fredag hadde møte.

Men i kulissane blir det jobba med ei rekkje andre alternativ.

• Les også: Analytikar har tru på storkommune langs «gullkysten»

Tre alternativ for Førde-storkommune

– Eg vil ikkje sjå bort frå noko. Når vi snakkar om ni kommunar, så er det for å bli eit stort kraft- og vekstsenter mellom Ålesund og Bergen. Då innser vel alle at skal vi bli det, så må alle ni kommunane vere med. Særleg må Flora vere med i tillegg til Gloppen, seier SiS-leiar og Gaular-ordførar Mathias Råheim (H).

Regjeringa vil ha færre og større kommunar. Over heile landet flørtar og drøftar gode og mindre gode naboar framtidige samanslåingar. Tidsfristane er korte. Alt i juni skal kommunestyra i dei ni kommunane rundt Førde ta stilling til kva alternativ dei ønskjer å gå vidare med. Så langt seier ein takk til alt.

– Vi har ein storkoalisjon med Gloppen, SiS-kommunane og HAFS. Totalt ni kommunar. Det er vi samde om. Så har vi to mindre alternativ. Eit med SiS-kommunane og eit med kommunane i Indre Sunnfjord. Vi har gått for alle tre avtalane, forklarer Råheim.

• Les også: Kan bli søkkrik storkommune over fylkesgrensa
• Les også: Nordfjord splitta i synet på framtidig storkommune

Samde om namn

Sjølv om mykje framleis er i det blå, er ordførarar og rådmenn samde om éin ting:

– Namnet var det ingen diskusjon om. Det er Firda for dei ni kommunane, og Sunnfjord for dei to mindre alternativa.

Mykje av uvissa vidare knyter seg til om kor vidt Flora og Gloppen vil vere med vidare. Gloppen er også i samtaler med naboar i Nordfjord. Skal dei vende seg i retning Førde, vil dei i alle fall sikre seg hovudsete for landbruksadministrasjonen.

• Les også: No ser dei storkommunane komme
• Les også: Støttar forslaget om Oslo-modell

Gav Flora lovnader

I kystbyen Florø er det ein utbreidd skepsis mot å sjå innover i landet. Her ivrar mange for ein stor kystkommune frå Sognefjorden i sør til Stadlandet i nord. Før fredagens møte gjorde utsendingane frå Flora det klart at skal Førde bli hovudsete, må også Florø få sentrale oppgåver i ein ny storkommune.

Det fekk dei også gjennomslag for, seier Råheim.

– Vi har gjort ein del endringar på dei ulike oppgåvene som skal vere i Førde og Florø, og også i dei andre kommunane. Vi skal forsterke dei kommunesentera vi har med servicetorg og nødvendige funksjonar. Florø har også fått med at dei skal vere med på ei deling av framtidige kommunale og statlege arbeidsplassar med Førde, opplyser SiS-leiaren.

• Les også: – Storkommune i Sogn kan gi nye statlege arbeidsplassar

Nøgd Flora-ordførar

– Eg opplever at det er stor forståing blant dei andre kommunane at dei må vise ein klar vilje til at Florø er viktig for ein slik storkommune. Vi må få vilkår som vi kan leve med om vi skal få støtte for ein storkommune i bystyret i juni, seier Flora-ordførar Bengt Solheim-Olsen.

– Viss ordførar og rådmann blir sitjande i Førde, kva type funksjonar ser du føre deg kan hamne i Florø?

– Det er for tidleg å seie konkret, men det er ein masse oppgåver som skal løysast. I alle fall viss kommunen skal omfatte 50.000 innbyggjarar. Det går an å tenke seg mange nye oppgåver. Det ein har sagt, er at all ny vekst skal fordelast jamt mellom Florø og Førde, og at viktige oppgåver skal leggast dit. Detaljane må vi komme tilbake til.

Solheim-Olsen strekar under at Flora også held fram å greie ut ein eventuell kystkommune, parallelt med prosessen i Førde.