– Vi har mange som seier dei ikkje vil ha skilt med SV. Eg reknar med at det har med politikk å gjera, seier Bente Bergfjord, fagansvarleg i Statens vegvesen til NRK.
Frå SU til SV
Dei nye SV-skilta står på rekke og rad i hyllene på Bergen trafikkstasjon i Fyllingsdalen. No er talet på registrerte bilar med SU-skilt blitt så høgt at det må nye bokstavar til. Reaksjonane har ikkje berre vore positive.
– Vi fekk ein del tilbakemeldingar frå kundar tidlegare som kvidde seg til dei nye SV-skilta skulle koma, seier Nils Georg Borlaug i Gudimbil.
Andre bilforhandlarar stadfestar at kundar ikkje vil ha dei nye skilta.
– Kundane seier det er politiske årsaker, seier Benedicte Sørvik, som er sekretær ved Frydenbø Bilsenter.
- Les og:
SV reagerer
– Eg syns dei må vera litt mindre surpompar, seier gruppeleiar for SV i Bergen bystyre, Oddny Miljeteig.
Ho synest det er rart at folk hissar seg opp over dette når mange tusen bergensarar i årevis har kjørt rundt med «reklame » for ungdomsorganisasjonen til SV, Sosialistisk Ungdom.
– Husk at SU er endå meir radikale enn oss, seier Miljeteig.
Håp for SV-hatarar
Alt håp er ikkje ute for dei som held fast på at dei ikkje vil bilen sin «øydelagt » av SV-skilt framme og bak.
Dei som ikkje likar SV eller SV-skilt (eller kanskje begge delar) kan nemleg få velja skilt frå andre distrikt.
Ulempen er då litt ekstra ventetid for dei fleste alternative skilta.