Navarsete i politiavhøyr

Samferdsleministeren må i politiavhøyr etter råkøyring i Lærdal.

Liv Signe Navarsete.
Foto: Heidi Lise Bakke. / NRK

På veg til vegopning i Lærdal 3. september skal bilen med samfersleminister Liv Signe Navarsete ha køyrt langt over fartsgrensa.

To journalistar frå avisa Nationen køyrde like bak, og har fortalt at bilen med samfersleministeren braut fartsgrensa i både 80-sona og 60-sona .

Seniorrådgjevar Dag H. Nestegard sat bak rattet og har lagt seg flat for kritikken .

Avhøyrde på telefon

Lærdal lensmannskontor har oppretta sak på føraren av bilen til Navarsete og journalisten i Nationen. Til NRK seier konstituert sjefsredaktør Håkon Barstad i avisa, at Nationen truleg vil betale ei eventuell bot som føraren av deira bil vil får .

- Samtlege av dei som var i bilen vil bli avhøyrde på telefon, seier fungerande lensmann i Lærdal Per Klingenberg.

I tillegg til Navarsete og Nestegard må også stortingsrepresentant Erling Sande som sat i baksetet, til avhøyr. Avhøyra vil bli teke fortløpande, truleg denne veka.

Rask avklaring

- Det er for å få bekrefta eller eventuelt avkrefta om det har vore stor fart, seier Klingenberg.

- Navarsete har sagt at ho ikkje merka noko til farten?

- Det vil avhøyret vise, seier han.

Klingenberg reknar med ei rask avklaring i forhold til om det vert teke ut tiltale mot førarane.

- Det vil skje så snart som mogleg etter at avhøyra er ferdige, sidan det har vore så mykje blest i avisene, seier han.

Førarane vil eventuelt bli straffa med bøter.