I dag er siste sjanse til å seie si meining om kven som skal leie landet dei neste fire åra.
– Eg kjenner meg litt vaksen no, seier Marita Bortne (18).
Ho stemmer for første gong, og var på plass i stemmelokala i Selje saman med mor si Møyfrid. Begge arbeider som helsefagarbeidarar.
Møyfrid meiner det er vanskelegare å stemme i år enn tidlegare.
– Det er så mykje rot no for tida, seier ho.
– Og på debattane er det berre krangling, legg Marita til.
Røysterekord
Ikkje alle vel å stemme på valdagen. Fleire enn 1,6 millionar har førehandsrøysta i Noreg. I Sogn og Fjordane tronar Årdal kommune på topp.
– Vi har hatt eit veldig godt system, har vore tilgjengelege og oppmoda om å stemme tidleg, seier Wenche Tryti Breivik, som leiar røystestyret i kommunen.
Også i Ulvik kan det bli tynt i rekkene i stemmelokala på valdagen. Der har allereie 60,93 % førehandsrøysta, høgst prosentdel i landet. Det er faktisk berre litt over 300 folkeregistrerte att som kan stemme på valdagen.
Ein av dei som var på plass i Årdal for å stemme på sjølve valdagen var Leif Guttormsen (68).
– No har eg gjort borgarplikta mi.
Han har stemt på det same partiet omtrent heile livet.
– Det er viktig å stemme. Om ikkje for meg akkurat no, så kjem det etterkomarar. Eg må ta vare på barnebarna, seier han.
Val 2021: Følg valkvelden og natta med NRK si valsending for Vestland
– Valdag er høgtidsdag
Rune Bortne er leiar for valstyret i Florø. NRK møtte han like før vallokala opna måndag morgon.
– Valdag i Florø er høgtidsdag. Vi synest dette er stas, og gjengen som er med har vore med mange gongar før, seier han.
I Florø var 470 innom stemmelokala på fredag. I Måløy var talet 180.
– Målet er at rundt 60–70 prosent skal røyste på førehand. Men det blir spennande å sjå kor mange som kjem innom i dag, seier Bortne.
Enno ikkje stemt?
Valnatta er NRK Vestland tettast på vinnarar og taparar i fylket. Det vert sending heile kvelden, delt mellom dei to valdistrikta i Vestland fylke.
Klokka 21:00 kjem dei første prognosane. Valsendinga kan ein sjå på nrk.no/vestland, i NRK TV og høyre på radio på P1. Sendinga startar kl. 19:45 og held fram til rundt midnatt.
Tilbake i Selje har også Sara Haaland trilla barnevogna til vallokalet for å avlegge si stemme. Ho meiner den har stor betydning.
– Noreg er eit såpass lite land at alle stemmer tel, slår ho fast.
Det er ikkje for seint å bruke stemmeretten sin. Ditt næraste vallokale og opningstider kan du finne her.