Garderobane kan fort bli ein mobbearena, meiner mobbeombodet i Hordaland.
– Me veit at mobbing skjer der dei vaksne ikkje er. Barn og unge skal sjølvsagt få ha sine fristader, men akkurat i garderoben er det fornuftig at det er vaksne til stades mesteparten av tida, seier Mari-Kristine Morberg, mobbeombod i Hordaland.
Men på Fridalen skole er det ikkje alltid ein lærar til stades i gymgarderoben.
Elevane Oda Sofie Rørlien Kvamme og Sebastian Neeven Rosendahl føler likevel at dei blir tekne godt hand om før og etter gymtimen.
– Viss det er ein mann, pleier han å banke på, og så kommuniserer me gjennom ein liten sprekk i døra, seier Oda Sofie.
Dei synest det er greitt at det ikkje alltid er ein lærar til stades.
Vanskeleg å få til
– Det er problematisk når ein berre har ein mannleg lærar til dømes, for då kan ikkje han gå inn i jentegarderoben og motsett, seier Rune Monsen, rektor på Fridalen skole.
Monsen synest det å ha ein lærar i garderoben heile tida er ein god ide, men at det er vanskeleg å få det til i praksis.
I ei nasjonal kartlegging om kroppsøving gjort av forskarar ved Høgskulen Innlandet sa over halvparten av elevane at det ikkje var ein vaksen til stades når dei var i garderoben.
– Sjølv om me ikkje har undersøkt om dette korrelerer med at mange blir mobba i garderoben, er det grunn til å tru at dette heng saman, fortel forskar Kjersti Mordal Moen ved Høgskulen Innlandet.
Tal frå den nyaste elevundersøkinga frå 2018 viser at 14 prosent av dei som blir mobba, fortel at mobbinga skjer i garderoben og i dusjsamanheng. Det er ei auke på to prosent frå året før.
– Me meiner heilt klart at læraren må bli ein tydeleg vaksen i garderoben. Det betyr ikkje at læraren må stå midt i garderoben til ei kvar tid, men at elevane skal vite at læraren er tilgjengeleg og ledig til å hjelpe, seier Moen.
Sender feil signal
Men fleire skuleleiarar meiner det blir feil å ha vaksne til stades i garderobane til kvar ein tid.
– Det er unaturleg og sender signal om at me tek for gitt at elevane ikkje klarer å oppføre seg, seier rektor på Bjørndalsskogen skole, Yngve Jørgensen.
Han meiner at ein må gå utifrå at elevane klarar å skifte i garderoben utan at det oppstår uønskte episodar.
På Bjørndalsskogen skole legg dei meir vekt på førebygging og å førebu elevane til dei skal byrje å dusje aleine.