Fylkesordføraren fekk kjeft i fjor – i dag fekk ho ros

Det er ein årleg tradisjon at fylkesordføraren held tale til fylkestinget der ho summerer opp året som har gått, og tek tak i aktuelle politiske problemstillingar.

I fjor fekk Åshild Kjelsnes kjeft for å vere for kritisk, særskild til regjeringa. I år fekk ho tvert om ros.

• HER KAN DU LESE HEILE TALEN TIL FYLKESORDFØRAREN.

– Vi må gå inn i oppgåvene nøkternt og realistisk, slik at vi ikkje skapar unødig uro og uvisse, sa ho frå talarstolen.

– Når det gjeld reformer er bildet framleis svært brokete og uoversiktleg. Vi har lidd nokre tap og vi har vunne nokre kampar.

Nye tonar

Noralv Distad (H), var blant dei mest kritiske i fjor. I år hadde pipa fått ein annan lyd.

– Denne talen var ein god attest på den sitjande regjeringa. Det er stor kontrast frå fjoråret.

Arve Mjømen (H) var einig, samtidig som han ville skryte av sin eigen partifelle.

– Dette var ein god tale. Det er mykje frå regjeringa å glede seg over. Mellom anna grøne sertifikat og kommunereforma. Vi må skryte av arbeidsmauren Bjørn Lødemel på Stortinget.

Tungsinn og trøyst

Senterpartiet var derimot kritiske til regjeringa. Fylkesvaraordførar Jenny Følling (Sp) opna med skryte av næringslivet i fylket, men var samtidig kritisk til forslaget om å fjerne den såkalla eksportstøtta for Jarlsbergosten.

– Det er viktige verdiar i fylket som står på spel. Vi har sett kva som skjedde med politidistriktet vårt då vi ikkje stod saman.

Arnstein Menes (Sp) fortalde han vart nærmast deprimert.

– Eg blir full av tungsinn. Det er så mange sentraliserande tendensar at eg fryktar for framtida. Eg gler meg berre til det blir regjeringsskifte.

Frida Melvær (H) svarte han.

– Eg får omsorg for Sp sine representantar når eg høyrer dei snakke med slikt svartsinn. Det er mykje å glede seg over.

– Regjeringa har levert på sakene som Sp ikkje greidde. Greidde de grøne sertifikat på åtte år? Nei. Greidde de ferjeavløysing? Nei. Greidde vi det på knapt eitt år. Ja.

Overraska over ros

– Fylkesordføraren synte seg nettopp som ein ekte fylkesordførar i sin tale. Ho løfta seg over svartmåling og retorikk, sa Frida Melvær (H).

Fylkesordførar Åshild Kjelsnes (Ap) sa til NRK etter debatten, at ho var overraska over rosen.

– Eg veit ikkje om eg skal vere bekymra eller glad for det, ler ho.

– Har du lagt deg på ei meir forsonande linje, fordi regjeringa leverer betre enn du forventa?

– Nei, det synest eg ikkje. Men eg må ta inn over meg dei rammevilkåra som er bestemt, og prøve å gjere det beste ut av det.