No må kommunane ta i bruk nynorskversjonen, oppmodar Vidar Høviskeland i Landssamanslutninga av nynorskkommunar.
Microsoft Office er det mest brukte dataprogrammet i verda. Det finst på 35 språk, no også på nynorsk.
Finst ikkje på hindi
Dagbladet skriv at dette er ei fjør i hatten for nynorskingane. For programmet finst enno ikkje på hindi som 235 millionar menneske snakkar. Microsoft har rekna ut av 700 000 kan tenkje seg ha nynorsk på pc-en.
Endre Brunstad, leiar i Noregs Mållag, meiner dette viser at det er mogleg å vise musklar overfor IT-giganten.
Også Landssamanslutninga av nynorskkommunar har pressa på i årevis for å få Microsoft Office på nynorsk. Tysdag kveld var versjonen klar til nedlasting.
Skulane har ikkje råd
Skulane NRK Sogn og Fjordane har hatt kontakt med er alle glade for nyheita om at Office er komen på nynorsk. Men kostnadene blir avgjerande for om elevane får nynorsk på PCen. Det seier Harald Aske, inspektør ved Sandane skule.
Ved Sogndal ungdomsskule er det ikkje er aktuelt å skifte ut maskinparken. Det er ein for stor kostnad, seier IT-ansvarleg Oddvar Walaker. Men når skulen skal kjøpe nye maskiner reknar han med at det blir med nynorskversjonen av Office 2003.