– Det er uakseptabelt og uetisk. Det er vanskeleg å ta omsyn til at ein skal destruere vel 50 tonn med fyrsteklasses mat, seier Odd Lothe Ohnstad.
Ohnstad er jeger og dagleg leiar for Haugen gardsmat i Aurland. Vel 1000 reinsdyr vil bli sendt til forbrenning når Staten skal utrydde villreinstammen i Nordfjella. Destrueringa startar når den vanlege jakta er over.
– Lite som skil frå vanleg jakt
Mattilsynet meiner det ikkje er tid i vintermånadene til å handtere slaktet. Ohnstad er heilt usamd:
– SNO vil ikkje vombe ut dyra som blir skotne i fjellet. Dette er skilnaden frå vanleg jakt. Logistikken elles er lik, dyra må merkast, fraktast til veg og takast hand om. Det må takast prøver. Det handlar om å få ut vomba, for ein røynd jeger er det snakk om fem minutt.
– Kan kjøtet vere farleg å ete?
– Alle skal sleppe å ete skrantesjuk mat. Alle slakt blir testa. Det er hundre prosent sikkert at CWD-kjøt ikkje vil nå marknaden. Dette er fyrsteklasses, prima råvare, seier Ohnstad.
Mattilsynet meiner det ikkje er tid
Seniorrådgjevar Kristin Ruud Alvseike i Mattilsynet meiner det ikkje er tid for SNO til å ta vare på kjøtet:
– Vi også ville bruke fullt brukbart viltkjøt, men etter å ha sett på det i praksis, så ser vi at det går utover sjansen til å bli kvitt skrantesjuka, seier ho.
Alvseike meiner det går med for mykje tid:
– Effektiviteten går ned, mykje logistikk må på plass, det er ulendt terreng, vinterstid er det korte dagar. Det viktigaste er å bli kvitt sjukdomen.
LES OGSÅ: – Må kaste 50 tonn reinsdyrkjøt
Massenedskytinga har starta
Totalt skal 2200 villrein i Nordfjella avlivast. Nedslaktinga skjer fordi ein skal hindre den alvorleg sjukdomen skrantesjuke i å spreie seg, potensielt kan den truge alle hjortedyr i Noreg.
Skrantesjuke (Chronic Wasting Disease - CWD) er ein dødeleg prionsjukdom som angrip nervesystemet hjå hjortedyr.
– Vi har håp om at jegerane under ordinær jakt får felt 1000 dyr, då vil det bli i overkant 1000 dyr igjen, desse blir ikkje menneskemat, seier Alvseike.
Kunne brukt meir tid
Ohnstad meiner Mattilsynet burde brukt meir tid på å skyte ned villreinen. Då hadde det vore lettare å berge kjøtet. I tillegg tyder ting på at smittespreiinga går saktare enn frykta:
– Ein kan utsette saneringa eitt år til, og frigjere massive ressursar.
Men Alvseike avviser at dei har meir tid:
– Det er ei heilt klar tilbakemelding frå Vitskapskomiteen for mattryggleik og andre fagmiljø at desto raskare vi tek ut smitten, desto raskare blir vi kvitt skrantesjuka, seier ho.