Meiner regjeringa sviktar gründerar

Fylkesordførar Åshild Kjelsnes i Sogn og Fjordane er klar i sin kritikk av den nye regjeringa. Dei må ta skulda for at gründerar får stadig mindre risikokapital tilgjengeleg.

Ho delar banksjef Arvid Andenæs i Sparebanken Sogn og Fjordane si uro over at sårt tiltrengd risikokapital i oppstartsfasen har blitt vanskelegare å få tak på.

– Dette er ein ønskt politikk frå den nye regjeringa. Sogn og Fjordane fekk etter mitt skjønn eit dramatisk kutt i midlane til næringsutvikling, og då blir det mindre pengar til regional utvikling og til å hjelpe gründerar og etablerarar, sukkar Ap-politikaren.

– Ei utfordring i tida framover

Det blir stadig meir krevjande for gründerar å få tak i sårt tiltrengt risikokapital.

For samtidig som fylket har få private kapitalmiljø, får Innovasjon Norge og fylkeskommunen mindre pengar til å støtte arbeidet med å skape nye arbeidsplassar.

I går tok Arvid Andenæs i Sparebanken Sogn og Fjordane eit oppgjer med dette.

– Eg ser på dette som ei utfordring for fylket framover, og synest at staten og regjeringa burde vore mykje flinkare sjå på moglegheita dei har til å løyve denne typen kapital, seier Andenæs til NRK.no.

Brukar heller pengane på veg

I statsbudsjettet vedtok nemleg regjeringa å kutte i verkemiddelapparatet. Dei har kutta i potten til distriktsutvikling, noko som gjer at både fylkeskommunen og Innovasjon Norge har mindre pengar dei kan fordele til ulike næringsutviklingsprosjekt.

Seinare har fylkeskommunen følgt etter.

• LES OGSÅ: Får 20 millionar mindre til næringsutvikling
• LES OGSÅ: Er føreslege 106 mill. til distriktsutvikling - set si lit til at den blå regjeringa ikkje kuttar

I staden skal dei vel 20 millionar kronene her i fylket kunne brukast på vegbygging.

Det meiner fylkesleiar Arve Mjømen i Høgre er fornuftig.

– Regjeringa prioriterer fram vegar, og meiner den regionale effekten ein vil få av gode og betre vegar er veldig nyttig for konkurranseutsett næringsliv.

– Dessutan er det slik at den tolmodige kapitalen kan dei framleis gje til gründerar innafor det budsjettet som det er rikeleg igjen av, seier Mjømen.

Men fylkesordførar Åshild Kjelsnes er usamd.

– Om vi berre ser på vegbygging og ikkje har midlar til å hjelpe etablerarar, så kjem vegbygginga til kort også. Og eg føler at den nye regjeringa ser vekk frå det.