Den samfunnsengasjerte 72-åringen er bekymra over at nasjonale saker og regjeringskrangel set dagsorden tre veker før kommune- og fylkestingsvalet.
– Bompengesaka er i utgangspunktet ei fillesak som ikkje burde ta heile fokuset i valkampen, seier Juklestad.
Ho meiner dei store mediesakene skuggar for dei lokale sakene. Ho trur konsekvensen kan vere at folk sluttar å bry seg.
– Fokuser på andre saker, elles blir veljarane leie. Dei gidd ikkje høyre på og engasjere seg, seier Juklestad.
- LES OGSÅ:
Ikkje overraska
Juklestad meiner følgene er alvorlege.
– Det er skadeleg for demokratiet, for folk sluttar å høyre etter, seier ho.
Ho stiller for ordens skuld på 37. og sisteplass på lista til Sunnfjord Venstre.
Førde-ordførar Olve Grotle (H) og ordførarkandidat i nye Sunnfjord kommune er ikkje overraska over at nokon meiner det blir for mykje rikspolitikk.
– Det er kanskje litt uheldig, fordi det lett kan stenge for saker som vi lokalpolitikarar og veljarane er opptekne av, seier han.
Må dekke ei regjeringskrise
Kommentator i Bergens Tidende, Jens Kihl, meiner det er nokre saker som må dekkjast – lokalvalkamp eller ei.
– Vi er nesten på randa av regjeringskrise, då er det vanskeleg å kome utanom, seier han.
Han er samd i at bompengesaka har dominert mykje i bergensavisene.
– Det er særleg fordi vi har Bergen som eit dekningsområde, i tillegg dekkjer vi det som skjer rikspolitisk. Men les du Hordaland, Sunnfjordland, Firda, ser ein at det er Engebøfjellet, samferdsel og ferjetilbod som dominerer. Så eg trur det er litt etter kven ein spør.
Kihl er klar på at journalistar speler ei viktig rolle for at veljarane kan gjere seg opp kvalifiserte meiningar før eit val.
– Eg trur vi kjem ikkje å verst ut av det i sum, seier Kihl.