Meiner forbod mot basehopping er nyttelaust

– Eg er mot lovforbod når det gjeld basehopping, seier politimeister Arnstein Nilsen til NRK.no.

Men nettopp spørsmålet om forbod mot basehopping er no oppe i Aurland. Sidan slutten av juli har tre basehopparar mista livet etter tragiske ulukker i kommunen.

Nilsen meiner det er håplaust å handtere eit slikt forbod.

– Politiet har ingen moglegheit til å kontrollere det som skjer. Difor blir det heilt meiningslaust, seier han til NRK.no.

Hoppar, trass forbod

I Trollveggen i Romsdalen kom det eit forbod mot basehopping i 1986. Det skjedde etter fleire dødsfall og mange vanskelege redningsaksjonar.

Men framleis vert det gjennomført fleire tusen hopp, og fleire har omkome.

• LES OGSÅ: – Ein heider til dei som søkte ekstreme utfordringar

Restriksjonar eller forbod mot basehopping er eit tema fleire har teke opp i Aurland den siste tida.

På kort tid har tre menn mista livet etter at dei har kasta seg ut frå fjell i den vesle kommunen.

I slutten av juli omkom ein 25 år gamal mann frå Florø etter ei basehoppulukke ved Skjerpi. Berre ein månad seinare miste ein 40 år gamal mann livet i ei ulukke ved fjellet Fetanipa. Og i helga skjedde det igjen, ein mann mista livet etter basehopping i Vassbygdi.

• LES OGSÅ: Mann i 20-åra omkom under basehopping i Aurland
• LES OGSÅ: Bror til kjend fotballproff omkom i basehoppulukka i Gudvangen
• LES OGSÅ: Basehopparen funnen omkomen

Bygdefolket vil ha slutt på hoppinga

Redningsaksjonane har vore omfattande og i farefullt terreng. Det vil bygdefolket ha slutt på, seier Mons Loven i Vassbygdi.

– Her er mange no etter kvart som har byrja å meine at vi må prøve å forby dette. Eg håpar kommunen tek tak i det og gjer det dei kan for å få stogga det, sa han til NRK.no i går.

• LES OGSÅ: Etter tre dødsulukker vil innbyggjarane ha slutt på basehoppinga

(Artikkelen held fram under TV-saka)

– Dette er ikkje noko vi kan leve med

Også ordførar i Aurland, Noralv Distad, meiner noko må skje. Han vil ikkje lenger utsette hjelpemannskapet for risikoen med farefulle redningsaksjonar. I går sa han at kommunen vil utarbeide restriksjonar mot hopping saman med Justisdepartementet.

– Det eine kan vere ei moglegheit for at det enkelte plassar blir lagt ned forbod mot å hoppe.

– Det andre er å vurdere ting som sertifikatordningar, meldeplikt og slike ting. På den måten kan ein få dette inn i meir ordna former enn vi opplever at det er i dag. I dag er det opp til kvar enkelt hoppar kvar han skal hoppe.

– Når det skjer så mange ulukker som vi har sett i vår kommune no, er det noko vi ikkje kan leve med, slo ordføraren fast.

• LES OGSÅ: Ordførar etter nok ei basehoppulukke: - Eg er uroa for utviklinga
• LES OGSÅ: Prega av nytt dødsfall - men trur ikkje forbod er løysinga

Politiet: – Vi kan ikkje forby det

Konstituert politimeister i Sogn og Fjordane, Ronny Iden, forstår at bygdefolket er uroa for fleire ulukker. Likevel er det vanskeleg å forby hopping.

– Vi har ikkje høve til å forby basehopping. Ein kan sjølvsagt i nokre område, heilt kortsiktig bruke politilova for å avgrense dette.

– Men det er ikkje aktuelt, og vi har heller ikkje noko heimel til å forby basehopping i eit større område, seier Iden til NRK.no.

• LES OGSÅ: 30 dødsfall i Norge - ønskjer ikkje forbod mot basehopp

Nektar utsetje redningsmannskap for risiko

Politimeisteren i Nordmøre og Romsdal politidistrikt måtte til slutt finne si eiga oppskrift på å ta vare på tryggleiken til hjelpemannskapet, utan å forby hoppinga.

– Det vi har kommunisert ut til basehoppmiljøet, er at om ein utset redningsmannskap for risiko, så blir det ikkje aktuelt å gjere forsøk på redning.

– Kva betyr det?

– Det betyr at om du blir utsett for ei ulukke, der faren for å bli utsett for ei ulukke er stor ved forsøk på redning, så vil du bli hengande i veggen. Død eller levande, for å seie det rett ut, seier Arnstein Nilsen.