– Det var i overkant av 1500 kilo på ein aksling. Det er sjåføren som bestemmer kva som skal lastast av, og då blei det passasjerar, seier inspektør Svein Ove Salt i Statens vegvesen.
Det var kontrollørar frå trafikkstasjonane i Førde og i Sogndal som hadde stilt seg opp på fylkesveg 60 over Utvikfjellet. Hovudfokuset var kontroll av turistbussar.
Passasjerane i den utanlandske bussen måtte vente medan resten av blei køyrde til Skei.
– Deretter måtte bussen tilbake til Utvikfjellet for å hente dei. Passasjerane forstod problemet og tok det med godt humør. Når dei reiser vidare i morgon, må selskapet skaffe ein ekstra buss for å kunne frakte alle vidare.
I tillegg til at 17 passasjerar måtte gå ut av bussen for at vekta skulle bli lovleg, vanka det også 7850 kroner i gebyr for overlasta.
Fare i trafikken
Tidlegare denne veka måtte ein busslast med franskmenn avslutte noregsturen med «følgjebil». For under ein kontroll blei det avdekka at bussen var 400 kilo for tung. Dermed valde guiden å sende bagasjen vidare med drosje.
– Kva tenkjer du om at det har vore to slike tilfelle med overlast på kort tid?
– Eg tenkjer dei kjøper rimlege bussar som ikkje er berekna til å gå denne typen trafikk, og dei får ein stor konkurransefordel samanlikna med dei som køyre lovleg. Det er viktig at alle selskap har like konkurransevilkår.
Han seier det er farleg å ha for mykje last når ein køyer.
– Alle køyretøy har bremser for å klare å stoppe ved den lovlege vekta. Er ho over, har dei ikkje lenger bremser til å stoppe. Dette utgjer stor trafikkfare.
Salt trur kontrollørane også det blir ein del å ta tak i vidare utover i turistsesongen.
– Vi ventar at det blir slik som no, med at folk ikkje har kvilt nok eller har overlast. Dette er viktig å ta tak i, for dette kan gå utover trafikktryggleiken, seier Salt.
Hadde ikkje kvilt nok
I løpet av kontrollen i dag, viste det seg også at føraren av ein annan utanlandsk turbuss ikkje hadde overhalde reglane for køyre- og kviletid. Sjåføren blei pålagd 45 timar vekekvile før han fekk køyre vidare.
– Turistane måtte fraktast vidare med ein annan buss, seier Salt.
Ein annan førar fekk åtvaring for brot på køyre- og kviletid, ein mangla førarrett på køyretøyet han køyrde, og tre køyretøy fekk skriftlege manglar. Men beltebruken var svært bra, og dei kontrollerte brukte belte, opplyser vegvesenet.