Mannen skal vere i god behald etter redningsaksjonen, skriv politiet på Twitter.
Politiet koordinerte aksjonen. Den utanlandske mannen var åleine og kommuniserte med politiet via tekstmelding.
– Ja, helikopteret er der. Ein redningsmann er sleppt ned for å hjelpe han, men det er utfordrande med sterk vind i området, sa Terje Magnussen ved politiets operasjonssentral.
Mannen skal ikkje vere skada, men stod heilt fast i fjellsida i fleire timar.
– Vi reknar med at dei klarer å redde han ut i løpet av kort tid, sa Magnussen klokka 16 i dag.
Klokka 17.15 sat framleis mannen fast. Krevjande vindforhold gjorde aksjonen utfordrande. Ein lege vart også sleppt ned i nærleiken av mannen, stadfesta Magnussen til NRK.
Lite batteri på telefonen
– Me fekk melding om dette rundt 14.35, sa Morten Rebnord ved politiets operasjonssentral.
– Han seier han er i nærleiken av Hoddevika i Nordfjord, og trur han er på rundt 400 meters høgd. Det er vind i området, så på bakgrunn av dette har me sendt ut eit redningshelikopter, seier Rebnord.
Mannen har lite kapasitet på telefonen.
– Helikopteret tek av frå Florø no, seier Trond Bjørnøy ved Hovudredningssentralen i Sola til NRK like før klokka 15.