– Dette er ei ganske så spesiell hending, humrar Knut Dahl-Michelsen, operasjonsleiar i Vest politidistrikt.
Fredag stansa politiet mannen i ein tilfeldig kontroll langs vegen i Leikanger i Sogndal.
På spørsmål om politiet kunne få sjå førarkortet til sjåføren, fekk dei seg ei overrasking.
Mannen hadde ikkje førarkort, men fortalde at han var på veg til oppkøyringa si i Førde for å få det.
Det er nesten 13 mil mellom Førde i Sunnfjord og Leikanger i Sogn.
– Som regel bruker ein å ordne seg skyss frå nokon andre, slik at ein har førarkortet når ein først set seg bak rattet, seier Dahl-Michelsen.
Men mannen var ikkje åleine i bilen. Han hadde også ein medpassasjer.
– Denne personen oppfylte ikkje krava for å vere følgjeperson, og baksida av bilen var ikkje markert med noko raud L.
Politiet godtok dermed ikkje forsøket på ei bortforklaring.
– Ekstremt uvanleg
Den noko spesielle hendinga får fleire køyrelærarar til å trekke på smilebanda. Ein av dei er Per Lysholt ved Pers Trafikkskule i Førde.
– Det er ekstremt uvanleg at slikt skjer.
Lysholt har fleire tiår med fartstid i bransjen.
– Sett vekk ifrå ei lita hending for om lag 20 år sida, har eg aldri høyrt om noko liknande, fortel han.
Politiet opprettar sak
Politiet har avhøyrt vedkommande, og har oppretta sak. Operasjonsleiar Dahl-Michelsen er ganske sikker på kva utfallet vil bli.
– Som regel blir det utsetting når ein køyrer utan førarkort. Det blir ikkje noko førarkort på karen i dag iallfall, seier han.
På spørsmål om kva som kan vere årsaka til at mannen tok bilen fatt, har Dahl-Michelsen ein klar teori.
– Det er jo langt mellom Sogndal og Førde, så han tenkte nok det var greitt å kunne køyre bil tilbake att etterpå også.