Politiet har no sikta ein mann i 60-åra etter ei hending på ein trafostasjon i Ytre Sandviken i slutten av september.
Mannen er sikta for forsøk på sabotasje.
– Han er sikta for å ha forsøkt å skada trafostasjonen, som kunne ha medført at fleire område i Bergen kunne ha vorte utan straum i fleire dagar, seier politiadvokat John Lode Roscoe.
Det skal dreia seg om eit forsøk på kortslutning, som kunne ha ført til straumbrot for innbyggjarar i områda Sandviken, Eidsvåg og Øyjorden. Samla dreier det seg om fleire tusen husstandar.
Ifølgje BT skal mannen ha prøvd å manipulera anlegget slik at det oppstod fare for eksplosjon.
– Han hadde lovleg tilgang til anlegget gjennom sin jobb, fortel politiadvokaten.
Arbeidsgjevar: – Ei alvorleg og trist sak
Mannn er sikta for brot på straffelova sin paragraf 192, som handlar om anslag mot infrastrukturen.
Denne paragrafen har ei strafferamme på heile 10 år.
– Eg vil understreka at dette er ei forsøkshandling. Ingen er skadd, og ingen eigedom er skadd, seier politiadvokaten.
Tilsett i BKK Nett
Ifølgje politiet er den sikta mannen tilsett i nettselskapet BKK Nett, og hadde difor lovleg tilgang til den aktuelle transformatorstasjonen.
– Han tok på eit tidspunkt kontakt med sin arbeidsgjevar, og innrømma forholdet. Me tok då umiddelbart kontakt med politiet, seier konserndirektør for kommunikasjon og samfunnskontakt i Eviny, Rune Indrøy.
– Kva skjer med hans arbeidsforhold no?
– Me ser på dette som ei personalsak, som eg ikkje vil kommentera nærmare. Me må også venta på politiet si vidare etterforsking, svarar han.
– Kva tenkjer de om det som har skjedd?
– Dette er ei alvorleg og ei trist sak. Og det er sjølvsagt tragisk at dette er gjort av ein tilsett, svarar han.
Skal i avhøyr
Mannen vart arrestert onsdag kveld, og sit i politiet si varetekt. Det vart gjennomført ei ransaking i samband med arrestasjonen.
– Eg ynskjer ikkje å kommentera korleis han reagerte då han vart arrestert, seier Lode Roscoe.
Politiet skal etterforska saka vidare, mellom anna for å finna ut om han hadde ei hensikt med å ta seg inn på området denne kvelden.
– Den sikta vil verta avhøyrt så snart det let seg gjera, seier politiadvokaten.
Dei har førebels ikkje grunn til å tru at han er involvert i hendingar på andre transformatorstasjonar.
Politiet vil i løpet av dagen fredag ta stilling om han skal bli framstilt for varetektsfengsling. Det vil i så fall skje laurdag.
– Eg har ingen kommentar til saken på dette tidspunkt, seier mannen sin forsvarar, advokat Ellen Eikeseth Mjøs.