Det var slektningar av mannen som fann bilen på taket i elva. Den omkomne vart funnen fleire timar etter at han køyrde av vegen.
Lensmann i Gaular, Erik Folland, trur ulukka hende mellom klokka 16 og 17 onsdag ettermiddag.
Foto Randi Indrebø NRK.
Slektningar av mannen undra seg då han ikkje kom heim til fjøsstellet onsdag kveld, og utpå kvelden valde dei å leite etter han sjølve. Kring klokka halv ni fann dei bilen hans på taket i Stordalselva, ein kilometer vest for Sande sentrum. Mannen har truleg køyrt ut i ein slak sving. Det var slaps ved vegbana, og bilen kan ha mista veggrepet på det glatte føret.
Ingen såg ulukka
Lensmann Erik Folland trur grunnen til at ulukka ikkje vart oppdaga før, er at det ikkje var vitne til utforkøyringa. I tillegg er sikta til elva dårleg frå vegen, så ingen forbipasserande har oppdaga bilen.