Mannen blei funnen livlaus mellom ein bil og ein tilhengar. Etter å ha forsøkt med hjarte- og lungeredning blei mannen erklært død, opplyser politiet i ei pressemelding. Dei pårørande er varsla.
Ulukka skjedde rett nedanfor ein gard i Angedalen i Førde. Mannen var busett i området. Det skal etter det politiet kjenner til ikkje ha vore vitne til hendinga.
– Ein mann er fastklemd mellom ein personbil og ein tilhengar. Han er bevisstlaus, uttalte Tatjana Knappen ved Vest politidistrikt til NRK tidlegare i dag. Politiet fekk melding om hendinga kl. 13.35.
– Vi er på staden og har starta etterforsking av hendinga, som vi reknar som ei ulukke, seier operasjonsleiar Per Algerøy.
Politiet melde først at mannen var kome i klem mellom ein hengar og ein traktor, men det viste seg å vere snakk om ein personbil og ein hengar, skriv dei på Twitter.
