Jobbannonsen har vore ute sidan 2014 – utan resultat

Det er åtte år sidan rekneskapskontoret Fjord Services i Måløy forsøkte å lokke til seg det dei trong mest: Ein autorisert rekneskapsførar.

I ein annonse som vart lagt ut på heimesida, på Finn og diverse sosiale medium, kunne selskapet tilby «varierte og spanande arbeidsoppgåver», «fagleg oppdatering» og «det gode liv i Måløy».

Men surfing på Stad, toppturar og fiske var ikkje nok – søknadane kom ikkje.

Dei neste åra har selskapet lagt ut den same annonsen, med små variasjonar, med håp om at søkarane skal dukke opp.

– Vi har oppdatert den slik at det ser ut som det er litt liv i oss, men vi har aldri fått førespurnader på bakgrunn av den annonseringa, seier eigar Kristian Skibenes.

Rekordmange jobbar

Verksemder over heile landet slit med å skaffe nok arbeidskraft.

Både NAV og SSB sin statistikk viser at det er rekordmange jobbar i marknaden akkurat no.

Dei siste sesongjusterte tala til SSB, fjerde kvartal i 2021, viser at det var 95.600 ledige jobbar.

Det er 30.000 fleire jobbar enn same kvartal i 2018, før pandemien.

Tala er også dei høgaste sidan 2010.

Tala frå NAV viser også ein tilsvarande tendens. Fjoråret var eit rekordår, der 484.000 stillingar vart utlyste.

Ein auke på 30 prosent samanlikna med normalåret 2019.

Apriltala for i år viser at tendensen forsterkar seg. Då vart 49.300 nye ledige stillingar registrerte på arbeidsplassen.no, som er ein auke på 9 prosent samanlikna med april i rekordåret 2021.

Må seie nei

Selskapet i Måløy kunne teke mange fleire oppdrag enn i dag – hadde dei berre hatt fleire tilsette.

I dag har selskapet ni autoriserte rekneskapsførarar. Fleire går av med pensjon dei neste ti åra. No vurderer dei å rekruttere nokon som kan jobbe frå ein annan stad, ettersom dei ikkje får tak i nokon som vil flytte til Måløy.

Då dei skulle ha tak i ny dagleg leiar for eit år sidan, var erfaringane med annonsering så dårleg at dei valde ein heilt annan strategi.

– Då måtte vi bruke profesjonelt rekrutteringsbyrå for å finne nokon.

Stor mangel

NHO brukar ordet «kritisk» om mangel på kvalifisert arbeidskraft i fleire yrke.

– Når bedriftene må redusere aktiviteten sin eller kanskje til og med stenge, så er det alvorleg, seier rådgjevar Ann-Kristin Kristoffersen i NHO Vestland.

To av tre NHO-verksemder oppgir å ha eit udekt kompetansebehov, viser NHOs kompetansebarometer for 2021.

Dette er ein rekordhøg andel.

Enkelte tal er ekstra skremmande for verksemdene no, viser undersøkinga:

• Det er særleg andelen verksemder med stor grad av udekt kompetanse som aukar: Frå 8 prosent i 2020 til 14 prosent i 2021.
• Nesten halvparten av verksemdene (45 prosent) skriv at mangel på kompetanse fører til tapte kundar eller marknadsandelar.
• Nesten halvparten av verksemdene (45 prosent) skriv at mangel på kompetanse fører til skrinlegging eller utsetting av utviding av verksemda.

Slit med rekruttering

Den mellomstore verksemda Eid Elektro på Nordfjordeid har 85 tilsette og merkar kor vanskeleg det er å få tak i ingeniørar.

Mønsteret er at mange av dei som flyttar ut for å ta høgare utdanning, ikkje flyttar heim igjen.

Akkurat no søker verksemda etter tre ingeniørar. Selskapet har ute annonsering etter denne type arbeidskraft «til ei kvar tid», seier dagleg leiar, Tore Hjelle.

– Det er den største avgrensinga på vår vekst. Vi kunne vakse meir hadde vi hatt meir folk.