Byrådets plan for Bergen sentrum får skarp kritikk frå både eigne parti og heile opposisjonen. Planen blir kalla både «vag», «lite forpliktande» og «ei ønskeliste».
Det er formuleringar som «sjå på moglegheita for gjennomføring av dialogmøte», som har fått politikarane til å rynke på nasen.
Næringskomiteen har sendt i retur planen som tre no avgåtte byrådar gjorde ferdig før sommaren. Den nye næringsbyråden Helge Stormoen i Frp vil lage ein meir konkret sentrumsplan for Bergen enn det hans forgjengar gjorde.
– Planen landa i fanget vårt igjen på tysdag. No skal me saman med komiteen sine medlemar gå gjennom han, for å få innspel til å endre det dei meiner er svakheiter ved planen.
- LES OGSÅ:
– Ein vag og lite konkret plan
I 2012 bestemte byrådet, med daverande næringsbyråd Gunnar Bakke, seg for å sette i gang med ein ny sentrumsplan for Bergen. Etter to års arbeid kom planen til politisk behandling tidlegare i sommar. Den skal innehalde tankar om Fisketorget i Bergen og sørge for «økt handelsomsetning og attraktivitet» i bykjernen.
Lista over kva som manglar i planen er veldig lang, sa Siw-Anita Lien i Arbeidarpartiet til NRK i går.
– Me må ha konkrete tiltak og prioriteringar, og det manglar denne planen fullstendig. Bergen treng ikkje ein plan på 50 sider med inspirasjon for kva som kanskje potensielt mogleg kan gjerast.
Ho er glad for at byråden vil forbetre sentrumsplanen.
– Det følast veldig godt at vi vert møtte med forståing frå byråden om at behovet var der for ein betre konkretisering av planen. Stormoen har vore samarbeidsvillig, seier Lien i dag.
Også Bergens næringsråd har kritisert sentrumsplanen for å mangle løysingar på korleis fleire skal kunne bu i Bergen sentrum.
Meiner forarbeidet har vore bra
Kor raskt ein ny plan vil komme på bordet, kan ikkje byråden svare på.
– Det blir i alle fall ikkje neste veke. Men eg håpar me skal få jobba fram ein ny plan raskt, seier Stormoen.
– Går det an å vri denne planen til å bli ein konkret handlingsplan eller er ikkje det tanken?
– Tanken er i utgangspunktet er at det skal vere ein ambisjon- og inspirasjonsplan. Konkrete tiltak vil ha ein pris og dette må me få baka inn i denne planen, seier Stormoen.
– Er det kjedeleg å få ein plan som tre andre byrådar blir kritisert for å ha laga for dårleg i fanget?
– Nei, eg føler forarbeidet har vore veldig bra.
- LES OGSÅ: