Lovar at utkantane ikkje blir reformtaparar

Mange er uroa for at beredskapen og utrykkingstida til politiet blir dårlegare når Sogn og Fjordane politidistrikt blir slått saman med Hordaland.

Måndag kom Humlegård til Sogndal for å roe leiinga i Sogn og Fjordane og Hordaland politidistrikt. Han gav klare signal om at Sogn og Fjordane ikkje blir nedprioritert.

– Vi skal få meir politiressursar også i Sogn og Fjordane. Dette er ikkje ei reform som gjer at det skal bli dårlegare polititilbod i Sogn og Fjordane, det skal bli betre.

Lovar å sørge for god beredskap

Sjølv om det blir færre lensmannskontor, skal det ikkje bli dårlegare beredskap, seier han.

– Vi skal legge opp til at det blir vakt- og beredskapsordningar i Sogn og Fjordane, som i andre stader i Norge som har særskilde utfordringar på avstand og geografi.

– Kan du garantere at dei grisgrendte kommunane i Sogn og Fjordane ikkje blir taparane som får meir enn 45 minutts responstid?

– Ja. Dei skal ikkje bli taparar. Vi måler no responstid for første gong og vi skal hauste erfaring, men då må også Sogn og Fjordane organisere polititenesta annleis enn i dag. Om ikkje vi gjer det, blir det heller ikkje betre resultat.

Når ein får vite korleis det nye politidistriktet med Sogn og Fjordane og Hordaland blir, er for tidleg å seie, ifølgje Humlegård.

– Det er den nye leiinga i politidistriktet som skal ha det endelege ordet på dette. Så startar også arbeidet med å slå saman lokale tenestestader. Kor mange lensmannskontor som skal slåast saman i dette politidistriktet, veit vi ikkje i dag.

• Les også: Fryktar for det lokale handlingsrommet til politiet

Politimeisteren mindre uroa

Politimeister i Sogn og Fjordane, Ronny Iden, er blant dei som har vore uroa for konsekvensane av reforma, men etter dagens møte med politidirektøren er han rolegare.

– Eg er ikkje så uroa no for at vi skal miste mykje av politikompetansen, slik som eg har vore. Dei signala som vert gjevne, er at det også skal vere rom for å bygge opp, vedlikehalde og vidareutvikle gode spesialistmiljø ute i politidistriktet. Det skal ikkje vere noko ein berre held på med i Bergen, seier han.

• Les også: Tilsette sluttar i politiet grunna uvisse

Ein meir optimistisk Iden meiner også det er fullt mogleg å ha ei god responstid sjølv om ein har færre lensmannskontor, så lenge det er gode beredskapsordningar.

– Eg har forventningar om at vi vil få ein god del av ressursane framover.