– Familien er glad og letta over at kommunen vedtek mobbe-bota

– Klienten min er glad for at kommunen min har vedteke denne bota. Det viser at dei tek dette på alvor, seier advokat Snorre Sæverås som representerer familien til det eine av borna som har blitt mobba.

• LES OGSÅ: Mor melder kommune til politiet
• LES OGSÅ: Høyanger kommune bryt lova - gjer ikkje nok mot mobbing

Gut vart halden under vatn

Som første kommune i landet fekk Høyanger kommune i førre veke ei føretaksbot på 100.000 kroner for å ikkje ha gjort nok for å hindre mobbing dei kjende til ved Høyanger skule.

Ein gut vart halden under vatn i symjetimen og angripen av ein medelev kniv.

Politiet la først vekk saka, men statsadvokaten kravde meir etterforsking, noko som til slutt resulterte i rekordbot.

• LES OGSÅ: Gut vart halden under vatn til han mista pusten - no har kommunen fått 100.000 i bot
• LES OGSÅ: Valde først å leggje vekk mobbesak fordi den var den første av sitt slag
• LES OGSÅ: «Heilt håplaust at ein elev skal oppleve mobbing nesten halve livet»

No håpar familien at dette kan stoppe mobbing av andre.

– Min klient håpar at denne saka kan bidra til at mobbing ikkje skjer igjen, og ønskjer at ingen born skal måtte oppleve det som hennar barn har gjort, seier Sæverås.

Kommunen ønskjer mobbe-dialog

Høyanger-rådmann Arve Varden legg seg på si side flat for kritikken som har komme fram i saka.

– Vi har meldt frå til politimeisteren i Sogn og Fjordane at vi har vedteke førelegget på 100.000 kroner. Vi ønskjer å legge denne keisame saka bak oss fortast mogleg, og vi ønskjer å komme i ein god dialog med foreldra og borna, seier han til NRK.no.

Rådmannen meiner kommunen har tatt viktige grep for å hindre liknande mobbesaker ved skulen med over 400 elvar.

– Vi meiner sjølv at vi har tatt rimeleg bra tak i dette. Vi jobba i heile fjor haust med å få på plass eit system som betre skal hindre at slike hendingar skjer.

LES OGSÅ: Vedtar mobbebot på 100 000 kroner

Kan komme erstatningskrav

Fordi mobbinga dei to elevane vart utsette for er alvorleg, og ikkje minst på grunnlag av følgjene av mobbinga, vurderer no familien eit erstatningssøksmål.

– No skal vi setje oss ned og diskutere dette. Generelt så kan ein seie at ei sak som denne kan opne for erstatning, men det har vi ikkje vurdert enno. Det vanlege er å gå etter den ansvarlege, som i denne saka er kommunen, seier advokat Snorre Sæverås.