Laga støttegruppe for offer for menneskehandel

– Eg har ikkje gjort anna enn å svare på telefon, mail og meldingar sidan programmet vart sendt. Det er svært mange som vil hjelpe Yasmin og dei andre som er utsette for menneskehandel, seier leiar for krisesenteret i Sogn og Fjordane, Wenche Hovland.

• Les også: Setter ofre i en umulig situasjon
• Les også: – Norge sviktet traffickingofferet Leah (28)

Dokumentar engasjerte mange

Brennpunktdokumentaren «Fortell og forsvinn» som vart sendt tysdag på NRK, handla om kvinner som vert selde som sexslavar på kryss og tvers av landegrenser. Og korleis dei opplever rettssystemet i Noreg etter at dei har fortalt sine historier til politiet.

Ei av kvinnene, Yasmin, kom til krisesenteret i Sogn og Fjordane for fem år sidan, og har sidan fått oppfølging og hjelp frå dei.

Programmet har ført til at fleire vil samle inn pengar og lage støttegrupper og svært mange har teke kontakt med Hovland for å prøve å få dette til.

– Dermed fann vi ut at vi kunne lage ei støttegruppe som har som mål å hjelpe alle som er utsette for menneskehandel. Pengane som kjem inn vil uavkorta gå til å hjelpe desse kvinnene, forklarer Hovland.

• Les også: Justisdepartementet forsvarer at ofre for menneskehandel sendes ut

Treng hjelp til alt

For behovet for hjelp er stort.

– Dei har absolutt ingenting. Dei har ingen rettar i Noreg og dermed fell dei ut av alle støtteordningane vi har også. Yasmin treng mykje legehjelp for å i det heile klare seg. Og det kostar mykje. Og alt anna kostar jo pengar.

Støttegruppa, som er på Facebook, har eit eige kontonummer som folk kan setje inn pengar på.

– Det betyr svært mykje for desse kvinnene at folk engasjerer seg. Dei er rørte og takksame for responsen etter programmet, seier Hovland.

• Les også: – Trygt å drive menneskehandel i Norge

«Opprivande og djupt tragisk»

Yasmin risikerer å bli sendt til Ungarn der ho er registrert som asylsøkjar. Men dei fortel at dei ikkje har moglegheit til å hjelpe ho. Saka er i rettssystemet i Noreg no, og neste sak skal opp i juni i år.

Hovland, som har fått tilbakemeldingane frå heile landet, seier folk fortel at dei vart opprørte av dokumentaren. Og at den har gjort sterkt inntrykk.

– Folk fortel at det er opprivande å sjå at menneske vert behandla slik og at det er djupt tragisk at det faktisk kan skjer, fortel Hovland.