Krisetal for Sunnfjord Energi

Administrerande direktør Fredrik Behrens seier året er rekorddårleg.

– Vi hadde eit første halvår som gjekk omtrent i null, og det er dårlegare enn vi har hatt nokon gong dei siste 10-15 åra.

I 2011 fordelte selskapet eit utbyte på nærare 30 millionar kroner til eigarane. I år kan det bli ingenting. Direktøren gjev den historisk låge straumprisen skulda for det, i tillegg til at selskapet må dekke inn store utgifter til utbygginga i Kjøsnesfjorden.

• LES OGSÅ: Norske vassmagasin er rekordfulle
• LES OGSÅ: Rekordlåge straumprisar både gler og uroar

(Artikkelen held fram under biletet).

Konsentrerer seg om vasskraft

No skal selskapet spare på det meste, seier Behrens.

– Vi har hatt investeringsplanar innan vindkraft og fjernvarme, no må vi fokusere på det som er vårt primære føremål, nemleg vasskraft, og då spesielt prosjektet i Jølstra.

• LES OGSÅ: Energiverk vil byggje ut i Jølstra

Heller ikkje dei komande fem åra ser lysare ut for energiselskapet. Difor vart eigarane kalla inn til ekstraordinært møte i september. Fjaler kommune eig 11 prosent i selskapet og er den nest største kommunale eigaren.

(Artikkelen held fram under biletet).

Går ut over eigarkommunane

Fjaler har i årevis kunna rekne med rundt tre millionar kroner i utbyte som har gått rett inn i drifta av kommunen. At desse pengane no fell vekk vil råke innbyggjarane, seier ordførar Arve Helle.

– Det er klart det vil ha konsekvensar dersom utbytet blir skrudd ned eller fell bort, det er det ikkje tvil om. Det er ingen av eigarkommunane som har ein økonomi som tillet at noko slikt kan skje utan at dei merkar det.

– Må ha is i magen

Drifta og økonomien av Sunnfjord Energi skal opp i formannskapa hos eigarkommunane. Helle seier kommunane må ha is i magen når det gjeld å halde på eigarskapen. Han meiner det er tenleg at eit eksternt selskap går gjennom drifta av energiselskapet.