– Monica Mæland er ein fare for verdsarven

– Dette kan vera spikaren i kista for bybanetrasé over Bryggen, meiner Harald Schjelderup som er gruppeleiar for Arbeidarpartiet i Bergen bystyre.

I uttalen sin om alternativa for Bybanen gjennom sentrum, meiner Riksantikvaren at det er «uakseptabelt» å legga bybaneskinnene over Bryggen. Vurderinga er på kollisjonskurs med konklusjonane i utgreiinga til Bergen kommune.

Også Byrådsleiar Monica Mæland har tidlegare uttalt at det naturlege vil vera å velja ei løysing som går minst mogeleg i tunnel. Schjelderup meiner linja til byrådsleiaren er ein fare for verdsarven i byen.

– Det er å oversjå både fagkunnskap og bergensarane sitt hjarte for Bryggen, Slik kan ein seia at Monica Mæland er ein fare for verdsarven, det vil ikkje Arbeidarpartiet vera, seier Schjelderup.

– Pussig

Byrådsleiaren er overraska over karakteristikken frå gruppeleiaren for det største opposisjonspartiet.

– Det er eit forunderleg angrep. I så fall er eg i eit god selskap med mange flinke fagfolk. Eg trudde ikkje Arbeidarpartiet hadde konkludert. Me i byrådet har ikkje konkludert, seier Mæland.

Mæland har tidlegare sagt at Bybanen bør gå mest mogeleg på gateplan. Då er Bryggen det einaste alternativet.

– Eg har peikt på at me gjennom ti år har bygd bybane og ikkje t-bane. Me valde menneske og byutvikling framfor fart, seier Mæland.

Fagleg usemje

I rapporten som kommunen har utarbeidd i samarbeid med konsulentselskapet Norconsult vert alternativa på gateplan over Bryggen derimot sett på som mindre skadeleg for kulturminna enn tunnelalternativa. Riksantikvaren ser det annleis.

Dei meiner alternativet med tunnelinnslag i Peter Motzfeldts gate er det som ser ut til å ta best vare på kulturminna. Etat for plan og geodata i Bergen kommune har rangert dette som det dårlegaste alternativet.

Riksantikvaren meiner konsekvensane av bybanetrasé over Bryggen ikkje er godt nok utgreidd.

– Uerstatteleg

I tillegg til at Riksantikvaren meiner traseen går for nært viktige bygg nær Bryggen, og at 40 meter lange bybanevogner kan skapa ei barriere over Bryggen er Riksantikvaren særleg uroa for spora etter tidlegare tider under bakkeplan.

«Som kulturminne er mellomalderbyen Bergen uerstatteleg og må derfor ikkje øydeleggast. Kulturlaga i byen er den einaste kjelda til kunnskap om visse sider av fortida sitt samfunn. Vert dei fjerna er dei borte for alltid.», skriv Riksantikvaren.

Med visse endringar meiner Riksantikvaren altså at tunnelalternativa er mindre i konflikt med med kulturminna enn dagalternativa.

– Overraska

Byrådsleiaren synst det er overraskande at Riksantikvaren og kommunen sine eigne fagfolk har komme fram til så ulike konklusjonar.

– Eg registrerer at fagfolka er veldig usamde, det kan jo verka forunderleg. Me skal i alle fall gjera saka så opplyst som mogeleg før bystyret skal konkludera, seier Mæland.

– Ikkje overraska

Schjelderup er slettes ikkje overraska over at Riksantikvaren kjem med heilt andre faglege råd enn Bergen kommune.

– Nei, den samsvarar jo med det Stiftelsen Bryggen og Hanseatisk museum har sagt tidlegare, at utgreiinga tar for lett på dei problematiske sidene ved å la bybanen gå over Bryggen.