– Vi kosar oss, men er litt leie av vestlandsvêret. 9 av 11 dagar så langt har det regna, seier John Ottesen.
I snart to veker har han og eit reisefølge på åtte testa campinglivet i Sør-Noreg. Dei siste dagane har familien frå Moss parkert campingvogna på Lone Camping i Bergen.
Dei gjer dermed som veldig mange nordmenn har gjort denne sommaren.
Nye tal frå SSB viser at det i juni i år var 20 prosent fleire norske overnattingar i år samanlikna med fjoråret.
– Vi har vore ein tur i Kristiansand, Sandnes og Stord. No har vi stoppa i Bergen i tre-fire dagar med mange ungar og stor familie. Det kan bli litt vel trongt med åtte stykk i campingvogna, seier John Ottesen.
Nedgang totalt sett
Ifølgje SSB har campingovernatting i år hatt ein mindre nedgang enn andre former for overnatting gjennom dei tre siste månadane.
Likevel fall totale overnattingar på norske campingplassar med 20 prosent i juni på grunn av koronapandemien.
På campingplassen i Arna har det vore romsleg med plass i ordreboka, trass i at mange fleire nordmenn har valt campingferie denne sommaren.
Mangelen på tyskarar i bubil merker dei der òg.
– Vi ligg cirka 60 prosent under totalt denne sesongen. I eit vanleg år er rundt ein fjerdedel av gjestene nordmenn, no er det jo knapt utlendingar her, seier dagleg leiar Henrik Lohne.
– Nordmenn reiser til distrikta
Fleire norske overnattingsstader melder no at turistar frå Europa melder sin framkomst. På Sørlandet kan sesongen verta like bra som i fjor, dersom trafikken frå utlandet blir som venta.
Slik blir det nok ikkje for Lohne på Lone Camping.
– Me kryssar fingrane, men slik aktivitetsnivået er no, så minner det mest om ein vanleg septemberdag.
Denne veka kom hotell-tala for dei største byane for juli månad. Tala visar at storbyane tapte, medan fleire av dei mindre byane hadde fleire gjester enn på same tid i fjor.
Tilsvarande julital finst enno ikkje for campingplassar, men Lohne meiner trenden også ser ut til å gjelde her.
– Vi fekk ein indikasjon på dette i mai-juni då vi omtrent ikkje hadde folk, medan dei måtte avvisa folk andre plassar. Eg trur Distrikts-Noreg har vunne på at utlendingane reiser til storbyane, medan nordmenn reiser til distrikta, seier Lohne.
– Aldri fått fleire telefonar
For ved Gloppen Camping & Fritidssenter i Nordfjord litt lenger nord på Vestlandet, kan mangeårig innehavar Rune Kjørvik glede seg over ein makelaus sesong.
Etter ein trong start, snudde alt ved jonsok.
– Eg har drive denne campingplassen i tjue år og har aldri vore i nærleiken av så mange telefonar, seier Kjørvik.
Ifølge NHO Reiseliv si medlemsundersøking i slutten av juli er det nettopp distrikta som haustar fruktene av nordmenn sin noregsferie.
Ifølgje Kjørvik har det vore stinn brakke på så godt som alle campingplassane i Sogn og Fjordane. Også telt-turistane har det blitt fleire av.
– Til og med småbarnsfamiliane trassar styggevêret og slår opp telt i silande regn. Eg trur eg hadde halde meg heime, humrar han.
For familien Ottesen går ferda med campingvogna vidare austover.
Trass i ein heller våt rundtur denne sommaren, utelukkar ikkje Ottesen campingferie også neste år.
– Vi er litt som gullfiskar, så vi gløymer fort. Vi går med friskt mot neste gang.