– Det er vel slik at vinterdekka skal bytast ut i morgon. Men eg ville venta til tysdag til vi ser om dei litt høgare temperaturane stabiliserer seg, seier vakthavande meteorolog ved Vêrvarslinga på Vestlandet, Steinar Skare.
Søndag føremiddag var det snøbyer og noko snø i vegbana på fleire av vegane i Sogn og Fjordane. Det er berre ein forsmak på kva bilistane kan vente seg utover dagen.
– Fram til kvelden blir det regn- og haglbyer og snøgrensa ligg på mellom 300 og 600 meter. Det er også utrygt for torevêr. Det har allereie vore litt av det i Sogne-regionen, seier Skare.
Ver obs på slaps i vegbana
Han åtvarar bilistane mot at det kan verte krevjande forhold på vegane, spesielt dersom du har lagt om til sommardekk.
– Eg ville nok venta til tysdag før eg la om. Folk bør generelt vere litt forsiktige på vegane når vêret er som no, seier Skare.
Den oppfatninga deler vakthavande på Vegtrafikksentralen, Jan Erikstad.
– Nett no ser det greitt ut. Det ligg snø einskilde stadar, men det dekkjer ikkje vegbana. Men kjem ein ut i det slapset som ligg i vegbana, kan ein fort miste kontrollen, spesielt dersom ein har lagt om til sommardekk, seier Erikstad.
Snøen kan komme til å leggje seg
Det blir til dels kraftige byer, og utover kvelden søkk temperaturen endå nokre hakk, og det vert snø- og sluddbyer også i låglandet.
– Vinden dreiar nordaust, vi får liten kuling, og sterk og stiv kuling ved stadt. Snø- og sluddbyene held fram gjennom natta, og då kan det fort bli glatt mange stadar. Ifølgje meldingane kjem det kraftige haglbyer, og eg trur det kan bli liggjande snø til måndag føremiddag, seier Skare.
Temperaturen er venta å gå ned mot null grader fleire stadar i løpet av natta.
– Det ligg ein kaldfront ved Island og den treffer oss i natt, seier Skare.
Meteorologen meiner likevel at temperaturane ikkje vert verande låge lenge.
– Det ser heldigvis ut til at dette berre varer fram til måndag føremiddag. På ettermiddagen ser det stor sett greitt ut, seier Skare.