– Viss vi vil ha arbeidsplassar i distrikts-Norge, og viss vi skal basere det på naturressursane våre – fortrinna våre – ja, då må vi også av og til våge å seie ja til det, seier statsministeren.
Laurdag har ho vore på valkamptur i Sogn og Fjordane, der turen mellom anna gjekk til øysamfunna Bulandet og Værlandet i Askvoll kommune. I tillegg besøkte ho kommunane Førde og Flora. Alle tre er nabokommunar til Naustdal kommune, der Kommunal- og moderniseringsdepartementet i april gav gruveselskapet Nordic Mining løyve til gruvedrift og dumping av avfallet i Førdefjorden.
I Førde vart ho møtt av Natur og Ungdom som gav ho laks for å symbolisere deira kampsak. Statsministeren takka fint for gåva, men tok til motmæle mot ungdommane.
– Den skal eg ta med meg, men det er ingenting i undersøkingane som er gjort som seier at vi risikerer å tape arbeidsplassar i fiskerinæringa, sa Solberg.
«Så forbaska 70-tals»
Gruvesaka har blitt ei kampsak både lokalt og nasjonalt, og vekt merksemd internasjonalt. Nyleg var tre partileiarar med på debatt om saka i Vevring i Naustdal, og Venstre-leiar Trine Skei Grande kalla gruveprosjektet for «forbaska 70-tals».
– Dette er så gamaldags, det er så forhistorisk at det berre må stoppast, sa Grande.
Orda kom under debatten som Natur og Ungdom arrangerte under sin sommarleir i Vevring. I Engebøfjellet over denne bygda skal sjølve gruvedrifta skje. I Førdefjorden like utanfor skal 250 millionar tonn gruveavfall dumpast dei neste 50 åra.
Det er dette som har fått miljørørsla til å steile og gjennomføre store protestar og varsle sivil ulydnad. Solberg meiner miljøkonsekvensane er akseptable.
– Det tek litt lenger tid for to fiskeartar å nå kritisk nivå i Norge, men utover det vil det bli stilt veldig sterke miljøkrav knytt til dette. Av og til vil det vere slike vanskelege avvegingar, seier statsministeren.
– Miljøkonsekvensane mindre enn føresett
Miljørørsla nektar å gje opp kampen, trass i at regjeringa allereie har sagt ja. I tillegg til varsel om sivil ulydnad, har saka blitt klaga opp på overnasjonalt nivå, til ESA.
Solberg understrekar at ho har stor respekt for at folk gjer ulike vurderingar i gruvesaka.
– Vurderinga departementet har gjort, er at arbeidsplassane i Naustdal er viktige. Det er viktig å utvikle denne typen næringar, samstundes som miljøkonsekvensane kanskje er mindre enn det ein såg føre seg i utgangspunktet, hevdar ho.