Klart for rettsak mot Helse Førde

Tingretten har vurdert kor vidt Sjukehusaksjonen har pengar til å gjennomføre ei rettsak mot helseføretaket.

Dommar ved Bergen tingrett, Eva Macody Lund seier dei etter ei heilskapsvurdering har funne at sjukehusaksjonen står godt nok rusta til å få føre sak mot Helse Førde.

– Etter mi vurdering har sjukehusaksjonen dokumentert at dei har tilstrekkeleg økonomiske middel til å dekkje eventuelle sakskostnader dei kan måtte betale, seier Macody Lund.

• LES OGSÅ: Dommarar ugilde i sjukehussak
• LES OGSÅ: Har ikkje pengar til rettssaka enno: – Men vi har pengar i ermet

Aksjonen går rettens veg for å få stogga nedlegginga av ortopedien ved Nordfjord sjukehus. Sjukehusaksjonen krev at Helse Førde blir pålagde å stogge avviklinga av ortopediverksemda ved Nordfjord sjukehus. Anten til vedtaket blir omgjort eller til anna kirurgisk kompetanse er på plass ved sjukehuset.

Sjukehusaksjonen har no lagt fram dokumentasjon på den økonomiske situasjonen, og Bergen tingrett har bestemt at det blir munnlege forhandlingar mellom aksjonen og Helse Førde 5. og 6 desember.

Målet er å kome fram til ei løysing før den planlagde avviklinga avviklinga av ortopedien 16. desember.