Klager på pakkar som ikkje kjem

Det er berre dagar att julaftan og i butikkar landet rundt hastar folk rundt for å sikre seg dei aller siste gåvene. Men mange har gjort handelen unna på internett. I år vil halvparten av nordmenn kjøpe minst ei julegåve via ein nettbutikk.

Men den enorme pågangen gjer at mange av leverandørane ikkje klarar å levere gåvene før jul. Det betyr at det kan bli tomt under mange juletre.

• LES OGSÅ: I år kommer julegavene med posten
• LES OGSÅ: Mange synes netthandel er for komplisert

Mangla mange pakkar under treet

Sølvi Hestvik frå Kvammen er ein av dei som har opplevd at julegåvene ikkje kom fram i tide. I fjor vart det mange pakkar som mangla under treet, difor har ho valt å handle gåvene i butikken i år.

– No handlar eg i butikkane, for då kjem det i alle fall under treet i tide, seier Hestvik.

For ho har brent seg på netthandelen. I fjor handla ho alle gåvene sine på internett i slutten av november. På den måten trudde ho at ho skulle spare både tid og pengar, og lenge var ho sikker på at ho hadde gjort eit kupp.

– Det er mykje lettare. Du slepp fullt i folk som trakkar alle vegar. Det er mykje betre å sitje heime i sofaen. Klikk, klikk, og så er det bestilt, seier Hestvik.

Men då familien kom saman på sjølvaste julekvelden i fjor var det mange av gåvene som ikkje var kome fram.

– Det mangla eit vaffeljern, ein walkietalkie, eit leikehelikopter, eit bilsete og ein steamvaskar. Så det var litt mange pakkar som mangla, seier Hestvik.

• LES OGSÅ: Unngå å bli svindlet i julehandelen
• LES OGSÅ: - Bruk kredittkort til julehandelen på nett

Nokre får ikkje pakkane i det heile

Og Hestvik er langt ifrå den einaste som har opplevd å sitje att med skjegget i postkassa på julekvelden.

Hos Forbrukarrådet er dei budde på ekstra stor på gang i desember, nettopp på grunn av julegåvehandel på nettet.

– Vi har mange som tek kontakt på grunn av dette. Nokre får ikkje pakkane i tide, andre får dei ikkje i det heile teke, seier regionsleiar i Forbrukarrådet, Pia Kleppe Marken.

• LES OGSÅ: Slik pakker du inn julegaven
• LES OGSÅ: Harde pakker under juletreet i år

(Artikkelen held fram under biletet)

– For mange handlar i siste liten

For når halvparten av oss nordmenn kjøper minst ei julegåve på nett betyr det stor pågang. Og det er det ikkje alle som klarar å ta unna.

– Blir det fleire kjøp over nett, så blir det også fleire klager. Dette er eit standard problem, seier Kleppe Marken og legg til:

– Dei fleste butikkane undervurderer nok kor mange som handlar i siste liten. Samtidig har dei lova at varene skal kome fram til jul, men så klarer dei ikkje å sende det ut før etter jul likevel.

• LES OGSÅ: Folk besvimer i julestresset

Jobbar overtid for at «alle skal få»

Mange av gåvene Sølvi Hestvik sikra seg i fjor, var varer ho handla på Netthandelen.no. Salssjef Erik Jensen fortel at dei ikkje fekk mange klager på for sein levering, men vedgår at auka handel i år byr på problem.

Dei kan no ikkje garantere at kjøp som er gjort etter 16. desember vert leverte før jul.

– Vi gjer alt vi kan for å få varene ut til kundane og vi har folk som jobbar overtid kvar einaste dag for å få det til, seier Jensen.

I år har ho full kontroll

Sølvi Hestvik har gjort seg ferdig med julehandelen for i år. Den siste gåva er i boks og no ser ho fram til ei jul der ho sjølv har kontroll på alt.

– I år skal alt hamne under treet. Viss eg då ikkje sjølv sviktar, men det trur eg ikkje skal skje, ler ho.