Det betyr at musikklinja på Voss og fleire andre trua studielinjer i Vestland no er redda.
– Dette blei eg glad for å lese. Veldig viktig for kulturlivet i regionen, seier Leif Ove Andsnes til NRK.
– I den tida me no er inne i, er det viktigare enn nokon gong å ta vare på gode opplæringstilbod for dei unge i Vestland, ikkje bygga dei ned, seier Karianne Torvanger (Ap), leiar for Hovudutval for opplæring og kompetanse.
Samarbeidspartia med livline
Det nye fylket slit økonomisk. Fylkesdirektøren i Vestland la derfor i førre veke fram eit forslag om å kutte ei rekke studielinjer.
– Det er såpass enkelt at vi har eit krav på oss til å redusere utgiftene våre med kring 80 millionar kroner. 20 millionar av dette skal komme frå reduksjon i tilbodet vårt, seier fylkesdirektør Bjørn Lyngdal til Firda.
Så snart forslaget vart kjend, oppretta skuleelev Kari Velken Meyer (18) ein underskriftskampanje. Nærare 5000 personar har signert.
– Dette er heilt vilt. Eg hadde håpa på at 500 ville skrive under, men på berre fem timar kom det over tusen, seier ho til Avisa Hordaland.
Dei seks samarbeidspartia i fylkestinget, Sp, Ap, MDG, KrF, SV og Venstre, bestemte tysdag å justere fylkesrådmannen sitt framlegg til endringar i opplæringstilbodet for skuleåret 2021/2022.
Justeringa inneber at fleire tilbod som var føreslått reduserte no blir vidareførte.
Andsnes: – Katastrofalt å miste
Meyer, som går tredje året på musikk-, dans- og dramalinja på Voss gymnas, meinte forslaget om å kutte både musikk- og kunstlinja på skulen var dumt. Skulen hennar brukte i 2018 over 20 millionar på nye klasserom.
I kampen for å redde utdanningane fekk elevane til og med ein verdskjend pianist med på laget.
Leif Ove Andsnes gjekk denne veka hardt ut i ei støtteerklæring til musikklinja på Voss vidaregåande:
– Det er uforståeleg at linja er nedleggingstrua. Musikklinjene har vist seg å vere av stor betydning for utviklinga av musikklivet generelt. Eit avgjerande bindeledd mellom grunnskule/kulturskule og høgare musikkutdanning. Det vil vere katastrofalt å miste dette utdanningstilbodet, skrev Andsnes i erklæringa.
Letta ordførar
Vossaordførar Hans-Erik Ringkjøb (Ap) er glad musikklinja og fleire andre no er redda.
– Disse utdanningane er grunnmuren i det som har skjedd på Voss dei siste 20–30 åra med tanke på festivar og anna kulturliv, seier ordføraren.
Kunst-, design- og arkitekturlinja ved Hafstad vidaregåande skule i Førde låg òg tynt an, men er blant studietilboda som no er redda.
I industrikommunen Årdal føreslo fylkesdirektøren å leggje ned industrilinja ved Årdal vidaregåande. Det førte til sterke reaksjonar i den største industrikommunen i gamle Sogn og Fjordane.
– Eit merkeleg val. Å fjerne eit såpass viktig tilbod vil få store konsekvensar for rekrutteringa, sa ordførar Hilmar Høl tysdag.
No er linja redda. Men Årdal vidaregåande skule mister derimot sal- og servicelinja og blir dermed ikkje heilt skåna for kutt.