– I høgfjellet er det venta kaldare temperaturar frå i dag, og mykje nedbør. Dette kan føre til periodar med snø, spesielt på nattetid, det seier Aslaug Skålevik Valved, vakthavande meteorolog ved Vêrvarslinga på Vestlandet.
Vi er framleis berre i september, men det er likevel moglegheiter for kvit melis på toppane i fjellet. Onsdag morgon var det snø på vegen over Sognefjellet.
Om du skal over dei høge fjellovergangane i dag eller til helga kan det vere lurt å byte til vinterdekk.
- LES OGSÅ:
Sognefjellet, Filefjell og Hemsedalsfjellet er mest utsett, medan over dei lågare fjellovergangane som Strynefjellet og Vikafjellet er det liten fare for glatt føre.
– Spesielt natt til laurdag ser det ut for at det skal snø på høgder over 1200 meter, medan på søndag blir det mildare og mindre nedbør, melder Skålevik Valved.
Kjetil Molvær på vegtrafikksentralen i Lærdal har følgande råd:
– Om du skal over fjellovergangane er det lurt å ringe 175 eller gå inn på vegvesenet si side for å få meir informasjon. Skal du over Sognefjellet fredag eller laurdag bør du byte til vinterdekk. Brøytebilane kjem til å strø etter behov.
Sjølv på låge fjellovergangar skal ein vere forsiktig, på kveldstid og nattetid kan det bli kuldegrader og frost i bakken.