Kaien som et av bygda

I sommar kan du vere med på alle dei 19 ferjeturane i fylket. I dag er det ferjestrekninga Jondal-Tørvikbygd i Hardanger som står for tur. Sambandet vert trafikkert av MF «Etne».

- På dei store utfartsdagane kan køen framleis stå langt ut i vegen, forklarer Oda Lothe som sel billettar på kaien.

– Og no må dei ta sveitserhus om kaien skal bli større. Det er kanskje ikkje så lurt.

Stor passasjerauke

Då Jondalstunnelen opna i 2012 vart sambandet plutseleg ein del av den raskaste vegen mellom Bergen og Odda. Medan ein heilt ny ferjekai stod klar på Årsnes lenger ute i fjorden kom trafikkauken til Jondal.

Her ønsker dei seg ny kai, men det er det ingen som vil betale for.

– Det er noko heilt anna enn tidlegare, ja. Det har endra bygda, seier Lothe som sjølv er frå Jondal.

Dette meiner NRK om Jondal-Tørvikbygd

Overfart og kaianlegg: 5

Ja, det er i Hardanger, men overfarten er faktisk ikkje veldig spanande. Unntaka er ved byrjinga og slutten. Særleg Jondal er ei perle.

Fartøy: 3

Det står "Etne" på sida, men ikkje la deg lure. Dette er gamle MF Askøy, bygd for rutelaget Askøy-Bergen av Mjellem og Karlsen i 1979. Eigentleg skulle den degraderast til reserveferje i 2011, men trafikkauken på Jondal-Tørvikbygd har gitt veteranen plass i startoppstillinga. Her er det mykje slite og utdatert. Salong berre under dekk.

Service og fasilitetar: 6

Restauranten framleis i drift, med eige kjøken på sida av hovudsalongen. Heilt grei kaffi. Toaletta lite innbydande. Rundt kaiane, særleg i Jondal, har dei mykje å by på. Positivt med vogn med Thai-mat, men denne var diverre stengt då eg vitja kaien.

Nostalgi og oppleving: 5

Denne ferja har eg nok reist med mange gonger tidlegare. Det er med eit nostalgisk vemod eg ser sideportane der askøyværingane strøymde ut på Nøstet fram til 1992. No er dei nok mura att for alltid. Det er og eit pluss med bilete av gamle ferjer på veggane.

Totalt 19 (av 40)