Over 80 mål skåra Morten Brandsdal og Ole Gunnar Hunderi til saman i fjor. Dei to herja vilt med svake motstandarar og laget gjekk frå kalassiger til kalassiger. Så lett blir det ikkje i år, men likevel trur NRK Sogn og Fjordane sitt fotballpanel at det held.
– Stryn har mista sin beste målskårar i Steinar Tenden etter at han reiste til Island. Etter mange harde diskusjonar vart det avgjerande for oss, seier sjefen i panelet, Geir Navarsete.
– Steinar Tenden skåra vel nesten 30 mål i fjor, og storebror Asbjørn kan ikkje erstatte han, sjølv om han er eldst. På den andre sidan har Brandsdal og Hunderi ikkje vorte dårlegare kjende med kvarandre i løpet av vinteren så dei kjem til å skåre i massevis, supplerer Stig Roger Eide.
Jevn strid
Men begge dei to og det siste panelmedlemmet Stig Nord meiner det blir jevnt. Ikkje berre mellom desse to laga – men at også Førde, Fjøra og Tornado/Måløy vil vere med til siste slutt i kampen om å få spele kvallik til 2. divisjon.
Sjølv om dei er samde i at Stryn har det sterkaste forsvaret og ein svært brei stall, landa dei altså på Jotun.
Beste målvakt
– Jotun har divisjonen sin beste målmann i Geir Nordnes, og det blir viktig så jamnt som det blir i år. Dessutan har dei fått Tore Gjerdalen og fleire gode spelarar frå ÅTIL/Lærdal etter at klubbane byrja å samarbeide, seier Navarsete.
Strynetrenar Johan Sigurdson meiner alt pratet om spissane er overdreve.
– Vi har planar om å stille med 11 mann vi, smiler han.