Skal ligge i fjellet døgnet rundt i jakta på jerven

– Av erfaring veit vi at det er større og større sjanse for at jerven kjem, dess nærare 15. februar vi kjem, seier Arne Bjørk, rovviltkontakt i Jostedalen sankelag i Luster.

Bøndene i Indre Sogn har opp gjennom åra mist tusenvis av sauer til jerv som har vore på tokt sommarstid. Men å jakte jerv på vinteren har vist seg vanskeleg. Sidan 2000 er 70 jervar drepne i Region 1 på Vestlandet, berre åtte av dei er skotne under ordinær lisensjakt.

Årets jakt blir avslutta om halvanna veke. Heller ikkje den ser ut til å gje resultat.

– For vår del er dette som forventa, vedgår Bjørk.

Frykta rovdyr

Jerven er eit frykta rovdyr for beitenæringa i Sogn og Fjordane. 2014 vart ein marerittsesong for bøndene. Då vart det utbetalt over 3 millionar kroner i erstatning, hovudsakleg etter at jerv hadde forsynt seg av sau på beite.

Heldigvis har tapstala gått ned, og dei to siste åra er det gitt vel 500.000 kroner i erstatning for rovdyrskadar. Likevel er det også denne vinteren gitt løyve til å felle 8 jerv i regionen.

Viltforvaltar Hermund Mjelstad hos Fylkesmannen i Sogn og Fjordane må konstatere at jakta gir dårlege resultat.

– Viss det ikkje blir felt jerv, og det framleis er jerv i området, så vil det som oftast føre til tap på beite til sommaren, seier han.

• Les også: Jeger felte jerv på usannsynleg vis

– Vanskeleg jakt

Men jervejakta er vanskeleg. Jerven er sky, og held seg ofte høgt til fjells i område som er utilgjengeleg for folk.

Dei siste åra er det gjort fleire grep i håp om å lukkast betre med jakta. I tillegg til kursing av jegerar, er det gjennom eit prøveprosjekt opna for bruk av lys på åte, kameraovervaking av jervebåsar og bruk av snøskuter til utplassering og tilsyn.

– Eg føler vi har gjort ein del, men dette er ei vanskeleg jakt. Ein må gjerne ligge å vente i fleire dagar i nærleiken av eit åte, seier Mjelstad.

Dersom jakta blir avslutta utan resultat, endar det truleg også i år med at Statens naturoppsyn gjer såkalla ekstraordinære uttak.

– Alle vil at jerven skal takast ut gjennom ordinær jakt, men dette blir ei naudløysing vi må akseptere, seier Mjelstad.

• Les også: Brukte 700.000 kroner for å flyge til fjells for å avlive jerv

Ligg på post siste veka

Arne Bjørk meiner beitenæringa gjer det dei kan for at lisensjakta skal lukkast.

– Vi legg til rette for jegerane med gode åteplassar og båsplassar, der vi veit at det ferdast jerv. Men det å få jegerar til å ligge 24 timar ute i utmarka, når det ikkje er jerv i område, det er ikkje lett.

Med knapt ei veke att av årets jakt har dei framleis ikkje gitt opp håpet. I Sogn ligg no jegerar på post døgnet rundt ved ein åteplass.

– Vi skuldar jegerane ei stor takk som vil stille opp for dette. Kanskje har vi flaks.