Lut lei problem med ny og miljøvenleg ferje – folk vil ha dieselferja fra 1975 tilbake

– Det har henda me har komme hit på ferjekaien og fått beskjed om at ferja er innstilt. Då må me køyra rundt. Det er klart at det går, men det er irriterande, seier Terje Sagebakken.

Han er busett rett sør for Haugesund i Rogaland. For å komma til arbeidsplassen sin på Langevåg i Bømlo kommune, litt lenger nord, er han avhengig av ferja.

Kvar dag tek han den frå som går frå Buavåg i Sveio og over til andre sida av fjorden.

Det er ikkje så lett lenger.

Med ferjeturen på 20 minutt er han på jobb i god tid før arbeidsdagen startar rundt klokka 8.

Hyppige innstillingar

Sidan starten av 2020 har dette ferjetilbodet nemleg ikkje vore til å stola på.

Då vart den nye og meir miljøvennlege M/F «Bømlafjord» med hybrid-drift sett inn for gamle M/F «Utstein» som gjekk på diesel.

Nye og meir miljøvennlege ferjer skal redusera klimagassutsleppa.

Reisande hadde sett fram til den nye ferja. No er dei lei alle problema.

Tekniske problem, vêr og sjukdom hos mannskapet gjer at Langevåg-Buavåg i åra 2020, 2021 og så langt i 2022, har hatt den dårlegaste regulariteten av alle samband i ferjefylket Vestland, syner tal frå Skyss.

Det betyr at det er ferja som oftast ikkje går når den skal.

– Me hadde ikkje desse problema med den gamle ferja. Det var ein del tekniske problem på slutten, men dette vart løyst relativt raskt, seier Sagebakken, som understrekar at han likar både det låge støynivået og fasilitetane om bord.

– Men, for oss pendlarane er kontinuiteten viktig, seier han.

Vil ha gammal ferje tilbake

Og det er ikkje berre Sagebakken som er lite nøgd med dei nye ferjene.

Både politikarar og administrasjon i Bømlo kommune har no skrive brev til Vestland fylkeskommune og bede om tiltak. Dei går så langt som å ønskja seg tilbake til den gamle ferja «Utstein» som gjekk i sambandet fram til 2020.

Det var Bømlo-nytt som først omtalte brevet.

– Situasjonen er ille når du tek deg i å drøyma deg tilbake til ei gammal ferje frå 1975. Det rista i kaffikoppane over fjorden, men ferja gjekk i alle fall, seier Ragnfrid Sønstebø, varaordførar i Bømlo kommune i Vestland.

Les også Pengedryss til satsing på reine ferjer

– Dette er rett og slett ikkje godt nok, seier Sønstabø.

Også Skyss er uroa over regulariteten. Så langt i 2022 har regulariteten forverra seg ytterlegare, samanlikna med 2020 og 2021.

– Me har nyleg bede Fjord1 om ein grundig gjennomgang for å finne årsakene til utviklinga og å få vite kva tiltak Fjord1 kan setje inn for å betre regulariteten framover, skriv pressekontakt Ingrid Dreyer i Skyss.

Reiarlag: – Forstår frustrasjonen

Operativ leiar i Fjord1, Dan Gunvald Nikø, seier han forstår frustrasjonen til folk.

Men både korona-sjukdom, tekniske utfordringar, og vêrtilhøve har gjort at det har vore mange innstillingar sidan ny ferje kom i drift.

– Først og fremst vil eg berre beklaga at me har hatt desse innstillingane. Det er på ingen måte ein ønskt situasjon for noko av oss, seier han.

Men han trur på betring i situasjonen framover.

– Regulariteten til sambandet vil eg tru vil auka framover. Me ser eit redusert smittetrykk. Dessutan er våren betre med tanke på vêrforhold og skodde, og me har god teknisk drift på fartøya no, seier han.

– Kva seier du til dei som ynskjer seg ei gammal ferje tilbake?

– Det vil overraska meg om ei gammal ferje skulle fungera betre i sambandet enn det me seglar med no. M/F «Bømlafjord» er bygd til sambandet og er godkjent av Skyss, seier Nikø.