Nyleg varsla Noregs vassdrags- og energidirektorat (NVE) at isbreane i Sør-Noreg vil smelte vekk innan 80 år. Smeltinga kan gjere aktivitetar på breen meir risikable. Fleire aktørar har allereie kutta i tilbodet innan brevandring.
– I framtida kan det bli naudsynt å få turistane opp i lufta for å oppleve isbreane, seier direktør Jon Brekke ved Norsk Bremuseum i Fjærland.
Bremuseet i Fjærland lever av breturisme. Sjølv om Brekke er overtydd om at forskarane ved NVE har rett, er han likevel ikkje bekymra for reiselivet.
– Me må tenke nytt, men håpar å kunne tilby spektakulære produkt sjølv når brearmane har smelta, seier Brekke.
NATUR I ENDRING: Jon Brekke syner oss korleis naturen vil utvikle seg i takt med den globale oppvarminga.
Foto: Lars VolldalFramtidas breturisme
Brekke ser ikkje vekk frå at turistane kan oppleve breane sjølv etter at brearmane har smelta.
– Ved hjelp av varmluftsballongar, lydlause dronar eller gondolbaner kan me ta med turistane over brearmane, meiner han.
Med dagens teknologiske utvikling trur ikkje museumsdirektøren slike løysingar er urealistisk.
– Planlegg Norsk Bremuseum i Fjærland å satse på slike løysingar?
– Sjølv om me har opplevd ei sterk auke i talet turistar dei siste åra, er bremuseet ei non-profit-verksemd og har derfor ikkje økonomi til å gjere slike investeringar åleine.
Vår viktigaste attraksjon?
Isbreane har vore ein turistmagnet i over 130 år. Breane er eit av hovudemna i den første reiselivsboka om Noreg. Thomas Bennet's «Handbook of Norway» frå 1859 nemner ordet «bre» over 50 gonger.
Framleis er naturbaserte opplevingar våre viktigaste attraksjonar. I 2017 anslo SSB at om lag 7 prosent av arbeidsplassane i Noreg er direkte knytt til reiselivsnæringa. Ferske tal viser at «ferie og fritid » står for nær 90 prosent av hotellovernattingane i Sogn og Fjordane. Korleis førebur reiselivet seg på livet utan ein av hovudattraksjonane?
LANG TRADISJON: Turisme har vore ei viktig næring for bygdene omkring Jotunheimen i over hundre år.
Støtte frå reiselivet
Reiselivsdirektør Ståle Brandshaug i Visit Sognefjord er positiv til Brekke sine idear. Sjølv om vandringa er ei unik oppleving, trur han opplevingar frå lufta kan bli ei populær erstatning.
– Det er absolutt spanande og ikkje urealistisk. Varmluftsballongar er lydlause og miljøvennlege alternativ som allereie er i bruk i andre land. Me er allereie i gang med ein ny reiselivsplan for Sogn og Fjordane som skal vera ferdig neste sumar.
– Vil de ta med dykk Brekke sine forslag i arbeidet med planen?
– Me vil invitere relevante aktørar til å tenke kreativt og bidra til å etablere nye produkt som kan kompensere for endringane som følge av den globale oppvarminga, seier Brandshaug.
