Her skal bønder bli utdanna i bruk av mjølkerobotar

– Robotteknologi er ein stor del av framtida for bønder, seier Anders Gåsemyr.

I lausfjøsen til 23-åringen går ei ku ut av mjølkeroboten medan ei ny går inn. Dette gjer dei heilt på eiga hand når dei ønskjer å bli mjølka.

Roboten tek seg av heile prosessen åleine, medan Anders kan stelle for dei andre kyrne.

Anders har teke over garden heime på Gåsemyr på Byrkjelo og driv mjølk- og kjøtproduksjon, men denne veka skal han tilbake på skulebenken att.

Fagskulen i Sogn og Fjordane satsar no på den heilt nye linja «Mjølkeproduksjon ved bruk av robotteknologi».

– Det er ganske relevant for meg, og eg kan kombinere det med å vere bonde på same tid, fortel Gåsemyr.

No vert han ein av dei fyrste i landet til å gå ei slik faglinje.

Unikt tilbod

Linja er eit 1-årig fagskuletilbod som går over to år på deltid. Her skal elevane lære om mjølke- og kjøtproduksjon i robotfjøs.

Ole Johnny Fjorden Solberg er fagleg leiar på den nye linja.

– Så vidt eg veit, er det berre ein stad på Austlandet og ein i Trøndelag som har eit liknande tilbod. Men vi har valt å vektleggje robotteknologi og presisjonsbiten i ein større grad, seier han.

– Det var jaggu på tide

Landbruks- og matminister Olaug Bollestad gleder seg over det nye tilbodet, og meiner det er viktig at landbruksutdanningane er «framoverlente».

– Eg ønskjer å seie lykke til den linja. Det var jaggu på tide. Teknologien er så framoverlent i norsk landbruk, og vi treng at skulane følgjer med, seier Bollestad.

Ho meiner meir teknologi og kunnskap om teknologi vil vere viktig i utviklinga til norsk landbruk og matproduksjon.

– Vi ber fylka om å heile vegen vere framme i skoa og lage linjer som passar til det moderne landbruket.

Den nye linja er finansiert av sparebankstiftinga, Fylkesmannen og fylkeskommunen.

Sove dårleg dei siste nettene

Ole Johnny Fjorden Solberg gler seg så mykje at det har gått utover nattesøvnen,

– Eg har sove så dårleg dei siste nettene på grunn av dette. Eg gler meg.

Han fortel at landbruket går «same veg som alt anna», fortel han.

– Alt skal effektiviserast og gjerast enklare. Mjølkerobotar vil vere eit fornuftig steg på vegen.