– Det dundra på døra mi. Alle blei varsla og kom seg ut. Men det å sjå på at leilegheita tek fyr, det var ei spesiell oppleving, fortel Ove Håkonsen.
I sommar opplevde han marerittet til alle huseigarar. Ei julinatt tok det til å brenne i rekkehuset der han budde i Førde i Sunnfjord. Håkonsen sov då brannen starta og vart vekt av naboar.
I dag er røykvarslardagen som skal minne folk om å bytte batteri i røykvarslaren.
Håkonsen seier han har vorte meir oppteken av å ha brannvarslinga i orden etter hendinga.
– No har eg flytt inn i ny leilegheit. Eg testa røykvarslarane i september, men kjem til å skifte batteria no i desember.
NY BUSTAD: Ove Håkonsen opplevde husbrann i Førde i sommar. No har han flytta i ny leilegheit.
Foto: Elise Kvien / NRKVarer 8–10 år
I norske heimar finst det kring 10 millionar røykvarslarar. Ei undersøking Norstat har gjort viser at halvparten av dei spurde ikkje veit kor ofte dei bør skifte røykvarslar.
Elektronikk blir dårlegare over tid. Og støv og smuss kan gjere at evna til å fange opp røyk blir redusert, ifølgje Norsk brannvernforening.
Røykvarslarar bør derfor normalt bytast ut etter 8 til 10 år.
– Du bør derfor sjekke kor gamle røykvarslarane dine er og vurdere om det er på tide å byte dei ut, seier kommunikasjonssjef Bjarne Aani Rysstad i Gjensidige i ei pressemelding.
Sjefingeniør Anders Blakseth i Direktoratet for samfunnstryggleik og beredskap (DSB) seier dei tilrår å byte røykvarslarar som er over ti år gamle.
– Ei livsforsikring
I snitt har det vore i snitt kring 400 bygningsbrannar og branntilløp i komfyr kvar månad dei siste fem åra.
Desember er månaden med flest tilfelle, viser ei oversikt frå DSB.
Til no i år har 35 personar mist livet i brann.
– Røykvarslaren er livsforsikringa di dersom det oppstår brann i eigen heim, seier avdelingsleiar førebyggande i Sogn brann og redning Torill Anita Segtnan.
– Mange er veldig flinke, men vi har også dei som ikkje heilt skjønnar vitsen med røykvarslaren. Det er ei plage når dei steiker mat eller let opp døra til baderommet.
Hennar oppmoding er å sjekke alle røykvarslarar, skifte batteri og kontrollere at sjølve varslaren ikkje har gått ut på dato. Både varslar og eventuell seriekopling må fungere.
– Vi har nok litt for mange som har utgåtte røykvarslarar eller varslarar der dei har teke ut batteria fordi dei trur ikkje har bruk for den.
