Første hydrogendrivne cruiseskip kan vere klart til 2025

– Vi satsar på hydrogen som den beste løysinga akkurat no i ein kombinasjon med batteri, nettopp for å kunne trafikkere verdsarvfjordane med cruiseskip etter 2026.

Det fortel Rolf André Sandvik, dagleg leiar i cruiseselskapet Northern Xplorer AS.

I ei pressemelding skriv reierlag at dei planlegg å bygge ein serie på 14 mindre hydrogen- og batteridrivne cruiseskip.

Det første skal stå klart i 2025 eller 2026.

2026 er same året som alle skipa som seglar i dei fem verdsarvfjordane skal vere nullutsleppsskip.

Det vedtok Stortinget for fire år sidan.

Det maritime klyngenettverket Ocean Hyway Cluster har sett på eit hybridskip med hydrogen i kombinasjon med vanleg drivstoff som ei moglegheit i møte med det nye miljøkravet.

– Eit slikt hybridskip er noko vi ser på som ei av løysingane i verdsarvfjordane, seier ingeniør Kristina Storegjerde Skogen.

– Ikkje ei løysing før om lang tid

Hamnesjefen i Aurland, Tor Mikkel Tokvam, trur ikkje hydrogen vil vere ei løysing for dei store cruisskipa allereie i 2026.

– Det er veldig bra at dei kan komme i gang med slike demonstrasjonsprosjekt. Men for næringa elles er ikkje hydrogen nokon løysing før om lang tid.

Han viser til at hydrogen er veldig energikrevjande å framstille. Ifølge han krev det mykje meir energi å framstille hydrogen, enn den energien du får igjen.

– Hydrogen kan vere ein del av løysinga fram i tid, men det er fleire flaskehalsar, seier han.

Cruiseskipsnæringa har tidlegare vore skeptisk til nullutsleppskravet, og har sagt at det er urealistisk med nullutslepp i verdsarvfjordane innan 2026.

Også Sjøfartsdirektoratet har peika på at teknologien ikkje vil vere på plass for å nå målet om nullutslepp om fire år.

Innan nyttår skal direktoratet komme med ein rapport som vurderer konsekvensane av kravet.

Sandvik i Northern Explorer forstår at cruisenæringa er skeptisk til det som kjem.

– Viss vi diskuterer dei store cruiseskipa som er i marknaden i dag, er ikkje teknologien her. Då må det heilt andre batteristorrleikar til og heilt andre hydrogenmengder til.

Dårleg infrastruktur

– Teknologien er ikkje problemet, men det trengst betre infrastruktur for at det skal vere realiserbart, seier Skogen i Ocean Hyway Cluster.

Ho trur det kan vere mogleg å realisere hybridskip med hydrogen og fossilt drivstoff innan 2026, dersom det blir satsa meir.

Ei av utfordringane er nemleg at det manglar infrastruktur for å bunkre skipa, altså å fylle dei med drivstoff.

– Det er ingen reiarar som vil bygge fartøy på hydrogen utan at dei er sikra at det er ein infrastruktur.