Kommunikasjonsrådgjevar Stein Lillebo seier Hurtigruten kan ende med å ta saka til retten.
– Vi har sett ein bekymringsfull vekst i hamnekostnadene våre, ein auke på 25 prosent frå 2009 til 2013.
Auken i anløpsavgiftene førte til at Hurtigruten samla rekneskap og informasjon frå alle dei 34 anløpa langs kysten. Ved eit 20-tals hamner konkluderte dei med at anløpsavgifta er for høg. Mellom dei hamnene er Måløy. For selskapet utgjer det millionar av kroner.
– Det er klart at vi er bekymra for den utviklinga, og vi ynskjer å sjå nærare på det.
- LES OGSÅ:
- LES OGSÅ:
– Heilt urimeleg
Hamnedirektør Trond Garshol i Nordfjord havn avviser blankt at anløpsavgifta er for høg.
– Vi synest det er heilt urimeleg, og det er ikkje berettiga i det heile.
Nordfjord havn er medlem av Havneforeninga som har hyra advokat.
– No er vi på veg til å finne ein revisor som kan kvalitetssikre dei tala dei har, så må vi sjå på utgreiinga av anløpsavgifta ein gong til.
– Må kanskje redusere ambisjonane
Nordfjord havn står føre betydelege investeringar for fleire titals millionar kroner, i Barstadvika i Måløy og i Olden. På førre styremøte bad hamnedirektør Garshol om fullmakt til å gjere tiltak for å betre den økonomiske situasjonen i det interkommunale selskapet.
– Må vi betale tilbake pengar til Hurtigruten vil det sjølvsagt slå negativt ut. Kanskje vi må vere litt meir forsiktige med å investere i Olden og Barstadvika, og vi må kanskje redusere ambisjonane våre.
- LES OGSÅ:
- LES OGSÅ:
Til retten?
Vert dei ikkje samde er Hurtigruten klar til å gå i retten, seier kommunikasjonsrådgjevar Stein Lillebo.
– For Hurtigruten er det snakk om så store beløp samla at vi er klare til å gå til rettslege skritt.